Qazaqstan syrttan tek arzan etti ımporttap, ony óńdeýge baǵyttap jatyr - A. Mamytbekov

ASTANA. 6 qarasha. QazAqparat - Qazaqstan syrttan tek arzan etti ımporttap, ony óńdeýge baǵyttap jatyr. Búgin Parlament Májilisiniń jalpy otyrysynda Aýyl sharýashylyǵy mınıstri Asyljan Mamytbekov osylaı málim etti. Eske salaıyq, jıyn barysynda «Qazaqstan Respýblıkasynyń keıbir zańnamalyq aktilerine agroónerkásip keshen máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Mınıstrdiń aıtýynsha, sońǵy jyldary aýyl sharýashylyǵyna kórsetilip jatqan memlekettik qoldaý óziniń oń nátıjelerin kórsete bastady. Aıtalyq, byltyrdan bastap elimizde tóldeıtin iri qaranyń árbirin ustap turýǵa 18 myń teńgeden sýbsıdııa tólene bastaǵan. Osyndaı qoldaýdyń nátıjesinde shaǵyn fermerlik sharýashylyqtar ósý ústinde. «Byltyr onyń aldyndaǵy jylmen salystyrǵanda fermer qojalyqtarynda ustalatyn tóldeıtin mal sany 25 paıyzǵa artty. Sonymen qatar, alǵash ret Qazaqstan sıyr etin eksportqa shyǵara bastady», - deı kele mınıstr Asyljan Mamytbekov qazaqstandyq ónim ázirshe ımportty yǵystyra almaıtynyn da jetkizdi. «Byltyr elimizge syrttan kelgen et kólemi 2011 jylmen salystyrǵanda shamamen 14 myń tonnaǵa artyq boldy. Sonymen bir mezette biz elimizdegi et ónimderin shyǵarýdyń 14 paıyzǵa artqanyn baıqap otyrmyz. Naqtyraq aıtqanda, byltyr elimizdegi óńdelgen et ónimderi 450 myń tonna artyq boldy. Sondyqtan da, syrttan keletin et ımporty negizinen tehnologııalyq óńdeýge ketip jatyr», - deıdi ol. Mınıstrdiń aıtýynsha, bul qalypty úrdis. Mysaly, vedomstvo basshysynyń málimetine qaraǵanda iri eksporttaýshy el sanalatyn AQSh jyl saıyn 600 myń tonna etti syrtqa shyǵarsa, ózi shamamen 500 myń tonna etti ımporttaıdy eken. «Eksportqa ettiń tek suranysqa ıe ári qymbat baǵalanatyn bóligi shyǵarylady, al ımportqa qalbyrlanatyn, óńdeýge jatatyn etter ákelinedi. Sondyqtan da, syrtta arzan et bolsa, ony alyp otyrý ońdy, óıtkeni biz óz balansymyzdy saqtaýymyz kerek. ıAǵnı, ózimizdiń sapaly etimizdi qalbyrlaǵansha ony qymbatqa satyp, esesine syrttan arzan et ákelip, ony óńdesek te bolady», - dep túsindiredi mınıstr.