Qazaqstan syrtqy saıasatyn kúsheıtýde - The Diplomat
ASTANA. QazAqparat - The Diplomat basylymynda Djordjtaýn ýnıversıtetiniń zertteýshisi Hamza Sharıfzodanyń Qazaqstannyń syrtqy saıasaty týraly maqalasy jarııalandy. Onda avtor Qazaqstan álemdik arenada óziniń bedelin arttyryp jatqany aıtylǵan. Sondaı-aq avtor «2014-2020 jyldarǵa arnalǵan syrtqy saıasat kontseptsııasyna» sáıkes Qazaqstan Respýblıkasy damýshy memleketterge qarjylaı kómek berip jatqanyn jazady.
«Táýelsizdik alǵannan beri Qazaqstan basqa memleketterge kómek kórsetýge 450 mıllıon dollar jumsaǵan», - deı kele avtor Dúnıejúzilik banktiń álemdik ekonomıkanyń básekege qabilettilik reıtınginde Qazaqstan 2012 jyly 51-oryn alǵanyn jazǵan.
«Bul Qazaqstan Prezıdentine jańa ulttyq strategııa - «Qazaqstan -2050» baǵdarlamasyn qabyldaýǵa áser etti. Bul baǵdarlamanyń basty maqsaty - Qazaqstandy damyǵan elý eldiń qataryna kirgizý», - dep jazady avtor. Onyń aıtýynsha, elimizde ártúrli memleketterdegi damý baǵdarlamalaryn qoldaýǵa arnalǵan KazAID ulttyq agenttigi qurylǵan.
«Qazaqstan kórshiles Tájikstanǵa 2015 jyly 4,7 mıllıon dollar gýmanıtarlyq kómek kórsetken. Sondaı-aq byltyr Nursultan Nazarbaev Ózbekstan prezıdenti Shavkat Mırzıeevqa qazaqstandyq oqý oryndarynda oqý úshin stýdentterge on myń grant bólýdi usynǵan edi. Al byltyr Qazaqstan Parıjde OESR basqarý komıtetiniń 25-plenarlyq otyrysyna shaqyrylǵan bolatyn. Sońǵy jyldary Qazaqstannyń halyqaralyq arenadaǵy róli artty. Qazaqstan Ortalyq Azııa elderi arasynan birinshi bolyp BUU Qaýipsizdik Keńesiniń turaqty emes múshesi boldy. Sonymen qatar 2017 jyly EXPO halyqaralyq kórmesin ótizgenin de atap ótý kerek», - dep jazylǵan basylymda.
