Qazaqstan syrtqy naryqqa 46 jańa taýar túrin shyǵardy
ASTANA. QazAqparat - Qazaqstan sońǵy 8 jylda syrtqy naryqqa 46 jańa taýar túrin shyǵara bastady. Bul týraly QR Investıtsııalar jáne damý mınıstri Jeńis Qasymbek Feısbýktegi paraqshasynda jazdy, dep habarlaıdy QazAqparat.
«Atameken» QR UKP Basqarma tóraǵasy Abylaı Myrzahmetovpen birge «Qazaqstannyń úzdik taýary» respýblıkalyq kórme-konkýrsyna qatystyq. Qýanatyn jaıt, aımaqtyq kezeńnen ótip kelgenderdi qosqanda konkýrsqa 1150-den astam óndirýshi qatysty. Bıyl jańa ónim túrleri bar jańa kásiporyndar kóptep kelipti. Bul otandyq ónim nomenklatýrasynyń ósimin kórsetedi. Kórmede túrli baǵyttaǵy taýarlar keńinen usynylǵan eken. Atap aıtqanda, mashına jasaý ónimderi, IT jáne telekommýnıkatsııalyq jabdyqtar, aıaq kıim jáne basqa da kıimder, lıftter men árleý materıaldary, farmatsevtıkalyq ónimder, jıhaz jáne taǵy basqa da kóptegen ónimder boldy. Bul kásiporyndar men jeke kásipkerlerdiń óz ónimderin ótkizýge jáne ilgeriletýge múddeli ekenin kórsetedi. Memleket basshysy Joldaýda otandyq kásiporyndardyń tutyný taýarlarynyń keń aýqymyn meńgerýge, bylaısha aıtqanda, «qarapaıym zattardyń ekonomıkasyn» damytýǵa nazar aýdardy. Búgingi tańda memleket bıznesti qoldaýǵa baǵyttalǵan, ásirese óńdeý sektoryndaǵy eksporttaýshylardyń ósimin yntalandyratyn birqatar keshendi júıelik sharalar qabyldaýda», - dep jazady mınıstr.
Mınıstr dereginshe, 2013-2017 jyldar aralyǵynda Qazaqstannyń jalpy eksportyndaǵy óńdeý ónerkásibiniń eksporttyq úlesi 23 paıyzdan 32 paıyzǵa deıin ósti. Elimizdiń syrtqy saýda aınalymy 25 paıyzǵa artyp, 69,5 mlrd AQSh dollaryna jetti, eksport 30 paıyz ósti jáne 48,3 mlrd AQSh dollaryn qurady. Import 29,3 mlrd AQSh dollaryn qurap, 15,5 paıyzǵa artty.
«Bıyl eksporttyń oń tendentsııasy saqtalýda. 2018 jyldyń 7 aıyndaǵy derekter boıynsha eksport 34 mlrd AQSh dollaryn qurady. Bul ótken jyldyń sáıkes kezeńimen salystyrǵanda 26 paıyz joǵary. Taýarlar eksportynyń qazirgi geografııasy 123 eldi qamtıdy. Olarǵa shamamen 800 taýar túri eksporttalady. Sońǵy 8 jylda Qazaqstan syrtqy naryqtarǵa 46 jańa taýar túrin shyǵardy. Atap aıtqanda, relster, avtomobılder, kún panelderi, gaz qazandyqtary, jyltyr plıtalar, kartrıdjder, pos-termınaldar, bıe súti, alıýmın profılderi, qubyrjol armatýrasy, shyraǵdandar, elektrovozdar, shatyr materıaldary, polımerden jasalǵan medıtsınalyq buıymdar, IP-MEDIA kommýnıkatorlary», - dedi Jeńis Qasymbek.
