Qazaqstan syrtqy ister mınıstrligi Vladımır Pýtınniń Astanaǵa keletinin rastady
ASTANA. QazAqparat – Reseı Federatsııasynyń Prezıdenti Vladımır Pýtın osy aptada Astanada ótetin halyqaralyq is-sharalarǵa qatysady. Bul aqparatty QR Syrtqy ister mınıstrligi rastady, dep habarlaıdy QazAqparat tilshisi.
QR Syrtqy ister mınıstrliginiń resmı ókili Aıbek Smadııarov «Vladımır Pýtınniń Azııadaǵy ózara is-qımyl jáne senim sharalary keńesiniń altynshy sammıtine, Táýelsiz Memleketter Dostastyǵy (TMD) memleket basshylary keńesiniń otyrysyna, «Ortalyq Azııa – Reseı» sammıtine qatysýy josparlanyp otyr ma?» degen suraqqa jaýap berdi.
«Iá, onyń keletini rastaldy. Vladımır Pýtın búkil is-sharalarǵa – AÓSShK sammıtine, TMD otyrysyna jáne «Ortalyq Azııa – Reseı» sammıtine qatysady», - dedi Aıbek Smadııarov QR SІM jýrnalısterine arnalǵan brıfıngte.
Aıta keteıik, Astanada ótetin AÓSShK sammıtine 11 memlekettiń basshylary qatysady. Olar – Ázerbaıjan, Irak, Iran, Qatar, Qyrǵyzstan, Reseı, Palestına, Tájikstan, Túrkııa, Ózbekstan basshylary.
Sonymen birge, AÓSShK baqylaýshy memleket retinde Belarýs prezıdenti de sammıtke qatysady.
