Qazaqstan syrtqy ekonomıkalyq qyzmettegi «Doing Business» reıtınginde 182-i orynda tur - B. Jámishev
ASTANA. 23 qyrkúıek. QazAqparat - Qazaqstan búgingi kúni syrtqy ekonomıkalyq qyzmetke qatysty «Doing Business» reıtınginde 182-i orynda tur.
Bul týraly búgin Májilistegi Úkimet saǵatynda QR Qarjy mınıstri Bolat Jámishev málim etti.
Mınıstrdiń aıtýynsha, bul tym tómen kórsetkish. «Degenmen, bul reıtıng qalyptasatyn kórsetkishterdi muqııat qarastyrsaq, onda mynany ańǵaramyz: Qytaı portynan Almaty qalasyna jetkiziletin bir konteıner úshin 4 myń 600 eýro shyǵyn ketedi eken. Al osynyń ishindegi 3 myńǵa tarta eýrosy tek sol Qytaı aýmaǵyna ketetin tasymalǵa tıesili. Al qalǵan soma Qazaqstan shekarasynan Almaty qalasyna deıingi tasymal men barlyq qujattardy ázirleýge, rásimdeýge ketetin shyǵyn bolyp tabylady. Al bizdiń zańnamamyz boıynsha qujattardyń aýqymdy bóligi syrtqy ekonomıkalyq qyzmetterge baılanysty bolyp tabylady», deıdi B. Jámishev.
Onyń sózine qaraǵanda, bul reıtıng negizinen memlekettik organdardyń qyzmetin baǵalaý úshin jasalmaǵan. «Bul reıtıng syrtqy ekonomıkalyq qyzmetke qatysýshylar úshin jasalǵan jáne olar jalpy Qytaı portynan Almaty qalasyna deıingi jetkiziletin shyǵyndarǵa negizdelip baǵalanyp otyr. Degenmen, bul reıtıng barynsha mańyzdy. Sondyqtan da, biz úshin aldaǵy ýaqytta basymdyq mindet - qaǵazbastylyqtan arylyp, elektrondyq aqparattyq úderiske barynsha beıimdelý», dedi Qarjy mınıstri.
«Keden organdary quqyq qorǵaý qyzmetin de júzege asyryp keledi. Osy baǵyttaǵy jumys barysynda byltyrǵy jyly 537 qylmystyq is, 12 myń 612 ákimshilik is qozǵaldy. Tárkilengen taýarlardyń jáne kontrabandalyq valıýtanyń jalpy somasy 6,2 mıllıard teńgeni quraıdy. Zańsyz aınalymnan 422 keli esirtki zattary, onyń ishinde 47 keli geroın alyndy», deıdi Bolat Jámishev.
Qarjy mınıstriniń aıtýynsha, keden organdarynyń laýazymdy tulǵalaryna qatysty 87 qylmystyq is qozǵalyp, 34 tórt sybaılas jemqorlyq quqyqbuzýshylyqtar áshkerelengen.
