Qazaqstan Sút odaǵy elimizdiń barlyq taýar óndirýshilerin sút ónimderiniń básekege qabilettiligin arttyrýǵa shaqyrady

ANA. Sáýirdiń 7-ci. QazAqparat /Qanat Mámetqazyuly/ -Búgin Aýyl sharýashylyǵy mınıstrliginiń qoldaýymen Qazaqstan Sút odaǵy elimizdegi sapaly ári qaýipsiz sút ónimderimen qamtamasyz etý máselelerine, salanyń básekege qabilettigin arttyrý sharalaryna arnalǵan konferentsııa ótkizdi.

Bul rette sút ónimderiniń básekege qabilettiligin arttyrý maqsatynda sala kásiporyndarynyń jumysyna sapa menedjmenti men qaýipsizdik menedjmentiniń halyqaralyq júıesin paıdalaný sharalary qarastyrylyp otyr, dep habarlaıdy QazAqparat.

Qazaqstan Sút odaǵynyń atqarýshy dırektory Vladımır Kojevnıkovtyń aıtýynsha, búgingi kúni resmı statıstıka boıynsha Qazaqstandaǵy sút jáne qyshqyl sút ónimderiniń ımporttyq úlesi 20 paıyzdy, maı ónimderi 40 paıyzdy, syr men irimshik 67 paıyzdy qurap otyr. «Sút ónimderi naryǵyndaǵy básekelestiktiń kóterilýi jaǵdaıynda elimizge ımporttalatyn ónimder úlesi de arta túsip, bul otandyq taýar óndirýshilerdiń óndirisin tómendetýge soqtyrýy múmkin. Bunyń ózi elimizdiń azyq-túlik qaýipsizdigine, mal sharýashylyǵy men shaǵyn óńdeýshi salalardyń damýyna teris áser etýi yqtımal. Sondyqtan da, bizdiń negizgi maqsatymyz otandyq taýar óndirýshilerdiń básekege qabilettiligin arttyryp, naryqtaǵy olardyń ımıdjin kóterý. Eń bastysy, bul baǵytta otandyq sút ónimderiniń sapasy men qaýipsizdigine basa nazar aýdarý qajet», dedi V. Kojevnıkov.

Onyń paıymdaýynsha, saladaǵy túıindi máselelerdi sheshýde 2009 jyly qolǵa alynǵan «Taza sút» baǵdarlamasynyń tıgizer yqpaly zor. V. Kojevnıkovtyń aıtýynsha, búgingi kúni bul baǵdarlama aıasyndaǵy bastamalarǵa sanıtarlyq jáne veterınarlyq qadaǵalaýdy júzege asyratyn atqarýshy organdardyń, mekemelerdiń qoldaýy asa qajet bolyp otyr.

Sonymen birge, konferentsııa barysynda sút ónimderin óńdeý salasyndaǵy problemalardy sheshý joldary, shaǵyn óńdeýshi kásiporyndardy yntalandyrý, sondaı-aq Kedendik odaq aıasynda otandyq ónimniń básekege qabilettiligin arttyrý máseleleri talqylandy.