Qazaqstan sý sharýashylyǵy salasyndaǵy ulttyq saıasatty únemi jetildirip keledi — mınıstr
TAShKENT. KAZINFORM — Qazaqstan sýdy tıimdi paıdalaný mádenıetin qalyptastyrýdy basym mindet retinde qarastyrady. Muny Tashkentte ótip jatqan «Water week» forýmynda sóz sóılegen QR Sý resýrstary jáne ırrıgatsııa mınıstri Nurjan Nurjigitov aıtty, dep habarlaıdy Kazinform agenttiginiń Tashkenttegi menshikti tilshisi.
— Qazaqstan sý sharýashylyǵy salasyndaǵy ulttyq saıasatty únemi jetildirip keledi. Jańa Sý kodeksi qabyldandy. Qujatta sý resýrstaryn basqarýdyń zamanaýı tásilderi qamtylǵan. Sondaı-aq, onda sýdy únemdeý máselelerine erekshe nazar aýdarylǵan. Biz sýdy aýyl sharýashylyǵy, ónerkásip jáne turmystyq sektorda tıimdi paıdalaný mádenıetin qalyptastyrýdy basym mindet retinde qarastyramyz, — dedi mınıstr.
Vedomstvo basshysy atap ótkendeı, alqaptarǵa zamanaýı sý únemdeý tehnologııalaryn engizý jumysy belsendi júrip jatyr.
— 2030 jylǵa qaraı 1,3 mln gektarǵa deıingi sýarmaly jerlerdi osyndaı tehnologııalarmen qamtý josparlanyp otyr. Qazaqstannyń Sý kodeksinde 2030 jylǵa qaraı tıisti súzgiden ótken sýdy qaıta paıdalaný úlesin 13%-dan 28%-ǵa deıin ulǵaıtý mindeti qoıylǵan, — dep toqtaldy Nurjan Nurjigitov.
Sonymen qatar, ekologııalyq bilim berý jáne sýdy únemdeý mádenıetin damytýǵa baǵyttalǵan halyqaralyq jobalar iske asyp jatyr.
— Halyqaralyq áriptesterdiń qoldaýymen «Sý jáne bilim berý» jobasy júzege asýda.
Osylaısha, Qazaqstan sý únemdeýdi óńirdiń sý qaýipsizdigi men ornyqty damýyn qamtamasyz etýge qaýqarly mańyzdy qural retinde qarastyrady, — dep málim etti mınıstr.
Eske salaıyq, taıaýda Kazinform agenttigine suhbat bergen ózbekstandyq sarapshy Vadım Sokolov aımaqtaǵy sý tapshylyǵy bıyl da kúrdeli ekenin aıtqan edi.
