Qazaqstan sýretshiler odaǵy 80 jyldyq mereıtoıyn Áýbákir Ysmaıylovtyń 100 jyldyǵymen qatar ótkizbek
ALMATY. 19 naýryz. QazAqparat - Áýbákir Ysmaıylov Qazaq sýretshiler odaǵyn uıymdastyrý komıtetiniń tóraǵasy bolyp, onyń negizin qalaýshylardyń biri boldy.
Bul týraly Qazaqstan sýretshiler odaǵynyń tóraǵasy Baıtursyn Ómirbekov búgin Almatyda ótken «Áýbákir Ysmaıylov shyǵarmashylyǵy mádenıettiń ózara árekettestigi aspektisinde» dep atalatyn ǵylymı-tájirıbelik konferetsııada aıtty.
«Áýbákir Ysmaıylovtyń shyǵarmashylyǵy qazaq mádenıetiniń barlyq salalaryna ortaq. Tek qana sýret óneri emes, teatr, kıno, bı de bizdiń mádenıetimizdi qalyptastyratyn, quratyn ónerdiń jıyntyǵy dep aıtýǵa bolady. Bıyl Qazaqstan sýretshiler odaǵy óziniń 80 jyldyǵyn atap óteıin dep otyr. Qazaq sýretshiler odaǵy Keńes odaǵyndaǵy eń alǵashqy sýretshiler odaqtarynyń biri boldy. Ábekeńdi 1932 jyly sýretshiler odaǵyn uıymdastyrý komıtetiniń tóraǵasy etip saılaıdy. Sondyqtan biz bıylǵy toıymyzdy Á. Ysmaıylovtyń mereıtoıymen qatar ótkizemiz degen oıymyz bar», - deıdi B.Ómirbekov.
Qazaq sýretshiler odaǵy óz qyzmetin 1933 jyly ǵana bastaǵan bolatyn. Sýret ónerinde bilim alǵan ulttyq kadrlar tapshy ýaqytta Á.Ysmaıylov, Ábilhan Qasteev, Oral Tańsyqbaevpen birge eýropalyq úlgidegi beıneleý óneriniń mektebin qalyptastyrýshylardyń biri boldy. B.Ómirbekovtiń aıtýynsha, sondyqtan bul qaıratkerlerdi jan-jaqty zerttep, olar týraly arnaıy murajaı ashylyp jatsa da artyq bolmas edi. Jalpy Qazaqstandaǵy beıneleý ónerinde sońǵy jyldarǵa deıin syn, zertteý máselesi óte qarqyndy júrdi dep aıtý qıyn. Sebebi óner tarıhy, óner syny, ónerdi zertteý máseleleriniń barlyǵyn buryn tek Máskeý men Sankt-Peterborda oqyǵan azamattar ǵana jasady. Bul jerde ondaı mamandardy daıyndaıtyn oqý orny bolǵan joq. Sol sebepti tolyq zertteý bolmady. Sondyqtan bul áli de bolashaqtyń enshisindegi jumys bolyp tur.
