Qazaqstan sýdy rásýa etý boıynsha «kósh bastap» tur – Qanat Bozymbaev
ASTANA. KAZINFORM – Prezıdent keńesshisi Qanat Bozymbaev «Global Water» atty sý únemdeý tehnologııalaryna arnalǵan birinshi halyqaralyq forýmda ońtústik óńirlerge sý únemdeý tehnologııalaryn jyldamdatyp engizý kerektigin aıtty.
«Eger sý máselesindegi ishki qaterler problematıkasy týraly aıtar bolsaq, bul da kóbimizge jaqsy málim. Bizge qazir sý paıdalanýdyń ónimdiligin arttyrý úshin qarapaıym, túsinikti, shyndyqqa úılesetin sharalar kerek. Qolda bar sý resýrstaryn únemdi paıdalaný máselesi ózekti bolyp tur. Ázirshe biz sý resýrstaryn óte-móte rásýa etip paıdalanamyz. Biz sýdy rásýa etý boıynsha óńirde «kósh bastap» turmyz. Tipti álem boıynsha da osyndaı deńgeıdemiz dep aıta alamyn», - dedi Prezıdent keńesshisi.
Sondaı-aq, ol aýyl sharýashylyǵynda sý paıdalanýdyń tásilderi qaıta qaralatynyn eske saldy.
«Aýyl sharýashylyǵy týraly aıtsaq, Memleket basshysy túrli sýbsıdııalardy sý únemdeý tehnologııalaryn paıdalaný deńgeıine baılap tastaý týraly keshendi tapsyrmalar berdi. Bizge sý únemdeý tehnologııalary men tıimdi ırrıgatsııa tásilderin búkil jerde engizý qajet. Bul ásirese ońtústik óńirlerge qatysty. Bıyl osy baǵytta belsendi jumys bastalý kerek», - dedi Qanat Bozymbaev.
