Qazaqstan sýarmaly sý alý úshin 4 elmen jeke-jeke kelissóz júrgizýge májbúr - mınıstr

NUR-SULTAN. QazAqparat - Qazaqstan sýarmaly sýdyń qajetti kólemin alý úshin Qyrǵyzstan, Ózbekstan, Tájikstan jáne Túrikmenstanmen jeke-jeke kelissóz júrgizýge májbúr. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Ózbekstanǵa keletin bolsaq, sý sharýashylyǵy qatynastary Syrdarııa ózeniniń basseıni boıynsha júzege asyrylady jáne Qazaqstan, Qyrǵyzstan, Ózbekstan, Tájikstan jáne Túrikmenstan arasyndaǵy besjaqty kelisim aıasynda retteledi. Kelisim aıasynda Vedomstvoaralyq úılestirýshi sý sharýashylyǵy komıssııasy jumys isteıdi. Syrdarııa ózeniniń basseıni boıynsha negizgi problema buryn Keńes zamanynda belgilengen sý resýrstaryn bólý tártibin buzý bolyp tabylady», - dedi ol Senat tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.

Onyń atap ótýinshe, Táýelsizdik alǵannan keıin elder táýelsiz sý sharýashylyǵy saıasatyn júrgizedi jáne kóptegen jaǵdaılarda tómengi aǵys elderiniń múddeleri eskerýsiz júzege asyrylady.

«Óz kezeginde, Qazaqstan ózenderdiń tómengi aǵysynda ornalasqan el retinde vegetatsııa kezeńinde sýarmaly sýdyń tapshylyǵyn qatty sezinedi. Osyǵan baılanysty, sýarmaly sýdyń qajetti kólemin alý úshin biz taraptardyń árqaısysymen jeke kelissóz júrgizýge májbúrmiz. Aıta ketý kerek, bıyl Ózbekstan Respýblıkasymen eleýli jumys júrgizildi. Osy jyldyń jaz aıynda problemalyq máselelerdiń barlyq spektrin qamtıtyn jáne olardyń sheshý merzimderin aıqyndaıtyn sý qatynastary salasyndaǵy yntymaqtastyq máseleleri jónindegi jol kartasyna qol qoıyldy. 1991 jyldan keıin salynǵan jáne qaıta jańartylǵan sý sharýashylyǵy qurylystaryna birlesken tekserý júrgizildi. Sondaı-aq, Transshekaralyq sý obektilerin birlesip basqarý, paıdalaný jáne qorǵaý týraly kelisim jobasy talqylandy», - dedi Maǵzum Myrzaǵalıev.

Sondaı-aq, ol transshekaralyq sý obektilerin birlesip basqarý, paıdalaný jáne qorǵaý týraly kelisim jobasy talqylanǵanyn aıtty.

«Bul buryn sý balansynda eskerilmegen sý qoımalaryn anyqtaý úshin jasaldy. Búgingi kúni kelisim jobasynyń mátini 80 paıyzǵa kelisildi. Kelissózder jalǵasýda. Bul bolashaqta Ózbekstan aýmaǵynda ornalasqan negizgi sý sharýashylyǵy ýchaskelerinde sý resýrstaryn bólýdiń ashyqtyǵyn qamtamasyz etýge múmkindik beredi», - dedi mınıstr.