Qazaqstan sý tapshylyǵy qaýpiniń aldynda tur – Májilis depýtaty
ASTANA. KAZINFORM – Májilis depýtaty Ashat Raqymjanov Sý resýrstary jáne ırrıgatsııa mınıstri Nurjan Nurjigitovtiń atyna depýtattyq saýal joldap, Qazaqstandaǵy sý resýrstaryn tıimsiz paıdalaný máselesin kóterdi.
Depýtattyń aıtýynsha, sarapshylar 2030 jylǵa qaraı Qazaqstanda sý tapshylyǵy qatty seziletinin, al 2050 jylǵa qaraı el tereń sý daǵdarysyna ushyraýy múmkin ekenin boljap otyr.
– Elimizdegi 8 sý sharýashylyǵy basseıniniń 7-eýi transshekaralyq. Bul Qazaqstannyń sý qaýipsizdigin kórshi memleketterdiń saıasatyna táýeldi etedi. Alaıda basty másele syrtqy faktorlarda ǵana emes, ishki resýrstardy tıimsiz paıdalanýda bolyp otyr, – dedi Ashat Raqymjanov.
Onyń málimetinshe, aýyl sharýashylyǵy eldegi sý resýrstarynyń 60 paıyzdan astamyn tutynady. Keı óńirlerde bul kórsetkish 79 paıyzǵa deıin jetedi. Alaıda ırrıgatsııalyq júıelerdiń tozýy saldarynan sýdyń edáýir bóligi egistikke jetpeı ysyrap bolady.
– Irrıgatsııalyq jelilerdiń tozýy 70–80 paıyzǵa jetken. Sonyń kesirinen ózenderden alynǵan sýdyń 50 paıyzdan astamy jerge sińip ketedi. Sońǵy 30 jylda sý paıdalaný koeffıtsıenti 0,8-den 0,5-ke deıin tómendedi, – dedi depýtat.
Sondaı-aq ol sý únemdeý tehnologııalarynyń jetkilikti deńgeıde engizilmeı otyrǵanyn aıtty. Ásirese ońtústik óńirlerde bul kórsetkish nebári 3 paıyz shamasynda.
Oǵan qosa Ashat Raqymjanov depýtattyq saýalynda eldegi sýdyń «kóleńkeli naryǵy» máselesin de kóterdi. Onda sý resýrstarynyń zańsyz paıdalanylyp, tólemsiz jumsalyp jatqany aıtyldy.
Sonymen qatar depýtat Úkimetke ırrıgatsııalyq jelilerge tolyq tehnıkalyq aýdıt júrgizýdi, sý urlyǵyna qatysty jaýapkershilikti kúsheıtýdi, óndiris oryndaryn aınalymdyq sý júıesine kóshirýdi jáne sý salasyndaǵy ǵylymı-zertteý áleýetin qalpyna keltirýdi usyndy.
Aıta keteıik, Qazaqstannyń alty óńirinde sý qoımalary men kanaldardy jańǵyrtý bastaldy.
