Qazaqstan sý sporty túrleri federatsııasyna jańa basshy keldi

ASTANA. KAZINFORM – Týrızm jáne sport mınıstri Erbol Myrzabosynovtyń qatysýymen ótken Qazaqstan sý sporty túrleri federatsııasy byltyrǵy maýsymdy qorytyndylaý jáne jańa maýsymǵa daıyndyq jıynynda federatsııanyń jańa prezıdenti saılandy. Bul týraly vedomstvonyń baspasóz qyzmeti málim etti. 

Қазақстан су спорты түрлері федерациясына жаңа басшы келді
Фото: ҚР Туризм және спорт министрлігі

Іs-sharaǵa federatsııa basshylyǵy, oblystyq federatsııa basshylary, sportshylar men federatsııa ókilderi qatysty. Jıynda federatsııanyń bas hatshysy Sergeı Drozdov keıingi birneshe jylda atqarǵan jumysy týraly baıandap, sý sporty salasyndaǵy mańyzdy jetistikterdi atap ótti.

Keıingi jyldary otandyq sportshylar halyqaralyq jarystarda joǵary nátıjelerge qol jetkizip, elimizde sý sporty túrlerin damytýǵa baǵyttalǵan jańa bastamalar aıtyldy. Jıynda federatsııa prezıdenti Andreı Krıýkov óz qyzmetin merziminen buryn toqtatatynyn málimdedi.

Onyń ornyna federatsııa prezıdenttigine «Samuryq-Qazyna» ulttyq ál-aýqat qory» AQ basqarma tóraǵasy Nurlan Jaqypovtyń kandıdatýrasy usynylyp, jıynǵa qatysýshylar, onyń ishinde oblystyq federatsııa basshylary men sport qaýymdastyǵy ókilderi biraýyzdan qoldady. Mınıstr Erbol Myrzabosynov 2019 jyldan beri federatsııany basqarǵan Andreı Krıýkovke atqarǵan jumysy úshin alǵys bildirip, Nurlan Jaqypovtyń jańa qyzmetine sáttilik tiledi.

«Týrızm jáne sport mınıstrligi atynan Andreı Krıýkovke eldegi sý sporty túrleriniń damýyna qosqan úlesi úshin rızashylyǵymdy bildiremin. Sý sporty – Qazaqstandaǵy eń tanymal sport túrleriniń biri. Búginde 120 myńnan astam adam osy sport túrimen aınalysady. Ulttyq quramanyń halyqaralyq arenadaǵy jetistikteri osy sporttyń el ishinde keńinen tanymal bolýyna yqpal etti. Dmıtrıı Balandınniń 2016 jylǵy Rıo Olımpıadasyndaǵy tarıhı jeńisi jáne byltyrǵy álem chempıonatynda kórkem júzýden Edýard Kım men Nargıza Bolatovanyń jeńisi – sý sportynyń elimizdegi áleýetiniń joǵary ekenin dáleldedi. Federatsııanyń jańa basshylyǵy bul jetistikterdi odan ári nyǵaıtyp, jańa belesterge jetedi dep senemin», – dedi mınıstr.

Jıyn sońynda Erbol Myrzabosynov Nurlan Jaqypovqa elimizdegi sý sporty túrleriniń halyqaralyq yntymaqtastyǵyn arttyrýǵa, sportshylardyń daıyndyq deńgeıin jaqsartýǵa jáne sporttyq rezervti daıarlaýǵa erekshe kóńil bóletinine senim bildirdi. Sondaı-aq federatsııa vıtse-prezıdenti bolyp, «Samuryq-Qazyna» Ulttyq ál-aýqat qory» AQ ekonomıka jáne qarjy jónindegi teń basqarýshy dırektory Mırat Maratuly Ótepov saılandy.

Aıta keteıik, Qazaqstan sý sporty túrleri federatsııasy 1998 jyly qurylǵan. Onyń quramyna júzý, sý doby, kórkem júzý, sýǵa sekirý jáne ashyq sýda júzý kiredi. Osy jyldar ishinde federatsııa kóptegen talantty sportshylardy tárbıelep, halyqaralyq deńgeıde joǵary nátıjeler kórsetip keledi.

Buǵan deıin habarlanǵandaı, Erlan Aqkenjenov Energetıka mınıstri bolyp taǵaıyndaldy.

Сейчас читают