Qazaqstan sý resýrstarynyń 44 paıyzyn transshekaralyq ózenderden alady
NUR-SULTAN. QazAqparat – Parlament Senatynyń Halyqaralyq qatynastar, qorǵanys jáne qaýipsizdik komıtetiniń múshesi Qaırat Qojamjarovtyń aıtýynsha, álemde 68 memleket sý defıtsıtin bastan keshirip otyr. Sonyń ishinde Qazaqstan da bar, dep habarlaıdy QazAqparat tilshisi.
Qazaqstannyń sý resýrstary jáne eldi sý qaýipsizdigimen qamtamasyz etý máselesi boıynsha Senatta baıandama jasaǵan Qaırat Qojamjarov álemdik resýrstar ınstıtýtynyń zertteýi boıynsha, sý jetkiliksiz aýmaqta búkil álemde 2 mlrd adam turyp jatqanyn atap ótti.
«68 memleket sý tapshylyǵyn erekshe bastan keshirip otyr. Sonyń ishinde Qazaqstan da bar. Geografııa ınstıtýty respýblıkany sýmen qamtý deńgeıiniń tómendep bara jatqanyn habarlaıdy. Eger 1960 jyldary respýblıkada sýdyń jıyntyq aǵyny 120 tekshe shaqyrymdy qurasa, qazirgi ýaqytta bul kórsetkish 101-ge deıin tómendegen. 2020 jyly ózen aǵyny 80-ge deıin, al 2030 jyly taǵy da 72 tekshe shaqyrymǵa azaıatyny boljanyp otyr. Buǵan qosa halyq men ekonomıkanyń barlyq salasynyń sýǵa degen suranysy artyp barady», - dedi senator.
Qaırat Qojamjarovtyń aıtýynsha, Búkilálemdik bank 2050 jyly aımaqtaǵy elderde sý tapshylyǵy saldarynan jalpy ishki ónim 6 paıyzǵa azaıatynyn boljaǵan.
«Qazirgi tańda sý resýrstarynyń 55 paıyzyn ǵana Qazaqstan óz aýmaǵynan paıdaǵa jaratyp otyr. Qalǵan 44 paıyzyn transshekaralyq ózender arqyly alady. Mundaı jaǵdaıda jerasty sýlarynyń mańyzy arta túsedi. Osydan 350 jyl buryn Qazaqstandaǵy jer asty sý qoryna joǵary baǵa berilip qoıǵan. Biraq, bul rette jańa dáýirde jer asty sýlarynyń halyqaralyq qorynyń boljamdy balansy eseptelmegen. Eski gıdrologııalyq túsirilimder qazirgi aqparattyq talapqa saı kelmeıdi. Zerttelgen keıbir aýmaqqa qurylys salynyp ketken. Keıbiri sanıtarlyq talaptarǵa saı kelmeıdi», - dedi ol.
Senator Qazaqstannyń sýdy únemdep paıdalaný jaǵynan barynsha jumys júrgizip jatqanyn aıtyp ótti.
«Alaıda sýdy joǵaltý kólemi 40 paıyzdy qurap tur. AQSh-ta sýdy joǵaltý deńgeıi 11 paıyzdy, Reseıde 21 paıyzdy, Ulybrıtanııada 23 paıyzdy kórsetken», - dedi ol.
