Qazaqstan sý resýrstaryn 15 jyldyq strategııaǵa saı keshendi josparlaýǵa kóshedi
ASTANA. KAZINFORM — Jańa Sý kodeksi boıynsha Qazaqstanda sý – strategııalyq shekteýli resýrs bolyp tanyldy, al onyń bólinýi qatań ǵylymı esepter men uzaq merzimdi boljamǵa negizdeledi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
QR Sý kodeksiniń 30, 31-baptary
1.Sý — kólemi shekteýli strategııalyq resýrs. Endi ony bólý qatań ǵylymı esepter men uzaq merzimdi boljamǵa negizdeledi. Jańa Sý kodeksi aımaqtardyń ekonomıkalyq damýy naqty sý qorlarynyń bolýyna tikeleı táýeldi bolatyn memlekettik josparlaý júıesine kóshýdi bekitedi.
2. Sý saıasatynyń eki tiregi
QR Sý kodeksiniń 30, 31-baptary
Jańa Sý kodeksine sáıkes, aldaǵy 15 jylǵa arnalǵan sý resýrstary salasyndaǵy memlekettik saıasat eki negizgi qujatqa negizdeledi:
Sý resýrstaryn keshendi basqarýdyń bas jospary — ulttyq deńgeıdegi strategııalyq qujat. Ol eldiń sý qaýipsizdigi maqsattaryn aıqyndaıdy, resýrstardyń (transshekaralyq ózenderdi qosa alǵanda) jaı-kúıin boljaıdy jáne ekonomıkada sýdy tıimdi paıdalaný talaptaryn belgileıdi.
Basseındik josparlar — bul Qazaqstannyń segiz sý sharýashylyǵy basseıniniń árqaısysyna arnalǵan naqty «jol kartalary». Olar jalpy maqsattardy jergilikti deńgeıdegi naqty sharalarǵa aınaldyrady: joıylyp bara jatqan sý aıdyndaryn qalpyna keltirýden bastap, bógetter men kanaldardy jańǵyrtýǵa deıin.
3. Basymdyqtar jáne ǵylymı tásil
QR Sý kodeksiniń 30, 31 jáne 39-baptary
Jańa Sý kodeksi sýdy paıdalanýdyń zańnamalyq ıerarhııasyn engizedi. Josparlarda mynalar eskerilýi kerek:
Ekologııalyq aǵyn — ózender men kólderdi saqtaý úshin tabıǵatta qalýy tıis sý kólemi. Bul kórsetkish basymdyqqa ıe jáne ekonomıkalyq qajettilikter úshin alynbaıdy.
Ekonomıkalyq tıimdilik — josparlaý barysynda ár salada paıdalanylǵan sýdyń árbir tekshe metriniń ekonomıkalyq qaıtarymy esepke alynady, bul sý únemdeý tehnologııalaryna kóshýdi yntalandyrady.
Halyq qaýipsizdigi — josparlardyń mindetti elementi retinde sý tasqyny men qurǵaqshylyq qaýpi bar aýmaqtardyń tsıfrlyq kartalary jasalady, onda naqty qorǵanys sharalary kórsetiledi.
4. Qoǵamnyń qatysýy
QR Sý kodeksiniń 4-baby
Josparlar jabyq keńselerde ázirlenbeıdi. Quramyna qoǵam ókilderi men sý paıdalanýshylary kiretin Basseındik keńester olardy talqylaýda mańyzdy ról atqarady. Olardyń usynystary osy qujattardy jańartýǵa negiz bolady.
5. Qujattardy ázirleý merzimderi:
2026 jyldyń sońyna deıin elimizdiń barlyq óńiri boıynsha Basseındik josparlar tolyq ázirlenedi.
2027 jyldyń úshinshi toqsanyna deıin basseındik derekter negizinde Sý resýrstaryn keshendi basqarýdyń biryńǵaı bas jospary ázirlenedi.
Bul qujattar ónerkásip, aýyl sharýashylyǵy jáne qalalardy damytý josparlaryn bekitýdiń irgeli negizine aınalady. Olardy eskermeı damý baǵdarlamalaryn qabyldaý múmkin bolmaıdy.
Osydan buryn jańa Sý kodeksi ónerkásipke árbir tekshe metrdi únemdeýdi mindetteıtinin jazǵanbyz.