Qazaqstan stýdentteri qatysqan aýqymdy forým jeńimpazy anyqtaldy
ALMATY. QazAqparat - Almatyda Ómirbek Joldasbekov atyndaǵy stýdentter saraıynda elimizdiń 63 joǵarǵy oqý ornynan stýdentter qatysqan «Men jastarǵa senemin» gala-forýmynyń jeńimpazdary anyqtaldy, dep habarlaıdy «QazAqparat» tilshisi.
Stýdent jastar forýmy aıasynda jarııalanǵan tórt baıqaýǵa qatysty. Naqtyraq aıtqanda, «Elimizdiń ınnovatsııalyq damýyna meniń qosqan naqty úlesim» atty ınnovatsııalyq jobalar baıqaýy, «Men memleketimniń gúldenýi úshin ne isteı alamyn?» atty esseler baıqaýy men «Men jastarǵa senemin!» poezııalyq shyǵarmalar baıqaýy jáne «Máńgilik el muratym!» atty patrıottyq ánder baıqaýy jas talanttarǵa jol ashty.
Bir aıǵa jýyq stýdentterdiń shyǵarmashylyq, ınnovatsııalyq jobalaryn saraptaǵan qazylar alqasy úzdik baıqaý jumystary men júldegerlerge syılyqtar tabys etti. 1-oryndy jeńip alǵan M.Haıdarı atyndaǵy Taraz memlekettik ýnıversıtetiniń stýdenti Karsheva Ksenııa endi Ulttyq ýnıversıtette 1 jyl tegin oqıtyn boldy.
«Qýanyshymda shek joq. Bizderge osyndaı múmkindikter jasaǵan uıymdastyrýshylarǵa alǵys aıtamyn. Men elimizdiń ıınovatsııalyq damýyna qosqan naqty úlesim» atty ınnovatsııalyq jobalar baıqaýy boıynsha jeńimpaz atanyp otyrmyn. Maǵan ál-Farabı atyndaǵy QazUÝ-de 1 jyl tegin oqý granty berilip otyr. Múmkindik bolsa, magıstratýramdy osy JOO-da jalǵastyrǵym keledi», - dedi Ksenııa Karsheva.
Atalǵan forýmda Shahmardan Esenov atyndaǵy Kaspıı memlekettik tehnologııalar men ınjınırıng ýnıversıtetiniń stýdentteri: Sábıt Mereke, Erhan Ońǵarbaev, Mahambet Turymov, Baýyrjan Demegenov, Bısembaı Ashat 2-shi orynǵa ıe bolsa, 3-orynǵa Almaty tehnologııalyq ýnıversıtetiniń stýdenti A.Kamalıeva laıyq dep tanylǵan.
Forýmnyń saltanatty ashylýynda sóz alǵan Ál-Farabı atyndaǵy Qazaq Ulttyq Ýnıversıtetiniń rektory Ǵalym Mutanov uıymdastyrýshylar alqasyna respýblıkanyń 63 joǵary oqý orny stýdentterinen 1 500-den astam jumys kelip túskenin aıtty.
«1,5 myń ótinish kelip tústi. Onyń ishinen 400 talantty stýdenttiń shyǵarmasy iriktelip alyndy. Búgingi forýmǵa Qazaqstandaǵy 63 ýnıversıtetten 281 avtor gala-forýmǵa shaqyrtý aldy. Olardyń barlyǵy búgin osy zalda, qatysyp otyr. Barsha qatysýshylarǵa alǵys bildiremin», - dedi Ǵ.Mutanov.
Aıta keteıik, ál-Farabı atyndaǵy Qazaq Ulttyq Ýnıversıtetiniń uıymdastyrýymen ótken gala-forým QR Tuńǵysh Prezıdenti kúnine jáne Táýelsizdiktiń 25-jyldyǵyna arnaldy. Atalǵan forým bıyl tórtinshi ret ótip otyr.
