Qazaqstan stýdentteri 1600-den astam bos bilim grantyna ıe boldy. VIDEO
ASTANA. 15 aqpan. QazAqparat - 2012-2013 oqý jylynyń ekinshi semestrinde 1668 stýdent grant boıynsha bilim alý múmkindigine ıe boldy, dep habarlady QR Bilim jáne ǵylym mınıstrligi Joǵary jáne joǵary oqý ornynan keıingi bilim departamentiniń dırektory Fatıma Jaqypova ortcom.kz saıtyna bergen suhbatynda.
«Bos bilim granttaryn taǵaıyndaý konkýrsyna jalpy eseppen 5 myńnan astam stýdent qatysty jáne konkýrstyń qorytyndysy boıynsha bilim mınıstriniń buıryǵyna sáıkes 1668 grant taǵaıyndaldy», - dep atap kórsetti Fatıma Jaqypova óz sózinde.
Іrikteý protsedýrasyna sáıkes, grant boıynsha bilim alǵysy keletin stýdentter joǵary oqý oryndarynda ótinish berdi. Qujattar aldymen ǵylymı keńesterde qaralyp, odan keıin naqty sheshim qabyldaý úshin eń laıyqty degen stýdentterdiń qujattary Bilim jáne ǵylym mınıstrligine joldandy.
«Joǵary oqý oryndaryndaǵy ǵylymı keńesterdiń quramyna stýdentter de kiredi. Sondyqtan da konkýrs protsedýrasy obektıvti boldy. Úmitkerlerdiń qujattary Bilim jáne ǵylym mınıstrliginiń qaraýyna túsken soń, munda biz qujattardyń qoıylyp otyrǵan talaptarǵa sáıkestigin taǵy bir ret tekseremiz», - dep atap kórsetti Joǵary jáne joǵary oqý ornynan keıingi bilim departamentiniń dırektory.
Odan keıin vedomstvo qujattardy mamandyqtar bólinisi, oqý formalary men merzimderi boıynsha qarap shyǵady da, oń sheshim qabyldanǵan jaǵdaıda, bilim grantyn taǵaıyndaý týraly buıryq shyǵarady.
Fatıma Jaqypovanyń aıtýynsha, memlekettik bilim grantyna ıe bolǵan stýdentter stıpendııa jáne kanıkýlda aýyldaryna baryp-kelýge ketetin jolaqylary úshin qosymsha ótemaqy alatyn bolady.
«Bul oqý barysynda úlgerim boıynsha eń joǵary nátıje kórsetken stýdentterge kórsetilgen úlken qoldaý dep sanaımyz. Oǵan qosa, irikteý kezinde olardyń qoǵamdyq belsendilikteri men áleýmettik jaǵdaılary da eskerildi», -dedi F.Jaqypova óz sózinde.
Bilim mınıstrligi ókiliniń habarlaýynsha, jalpy respýblıka boıynsha 360 jýyq stýdent kúndizgi bólimde oqıdy, onyń ishinde byltyrǵy granttar sany 34 314 myńdy quraǵan. Negizinen tehnıkalyq, medıtsınalyq, pedagogıkalyq, jaratylystaný-ǵylymı mamandyqtarǵa basymdyq berildi. «Bul mamandyqtardyń barlyǵy elimizdi údemeli ındýstrııalyq damytý basymdyqtarymen mazmundalyp otyr», - dep túıindedi óz sózin ol.
