Qazaqstan stýdentter sany jaǵynan Frantsııa, Ulybrıtanııa, Germanııa syndy álemdik derjavalardyń aldyn orap tur
ASTANA. 27 qyrkúıek. QazAqparat - Eldiń áleýmettik damýynyń mańyzdy kórsetkishi bilim berý júıesi bolyp tabylady.
Bilim berý deńgeıi boıynsha Qazaqstan álemdik kóshbasshylar sanatynda.
Eresekterdiń saýattylyq deńgeıi:
BUU DB-nyń «Ornyqty damý men múmkindikter keńdigi: barlyǵy úshin jaqsy bolashaq» baıandamasynda 2011 jyly Qazaqstandaǵy eresek turǵyndardyń saýattylyq deńgeıi 99,7 paıyzdy quraıtyny atap ótildi. Bul bizdiń elimizge álemniń 187 eliniń ishinde atalǵan kórsetkish boıynsha kóshbasshy pozıtsııalardyń birin ıelenýge múmkindik berdi. Eresek adamdardyń saýattylyq deńgeıi jóninen Qazaqstanǵa jaqyny Reseı - 99,6paıyz, Italııa - 98,9 paıyz. Aıtarlyqtaı tómengi kórsetkishter Sıngapýrda - 94,7 paıyz jáne Túrkııada - 90,8 paıyz.
Bastaýysh jáne orta bilim berý:
Qazaqstan balalar men jastardy bastaýysh jáne orta bilim berýmen qamtý boıynsha 187 eldiń ishinde Adam damý ındeksiniń reıtınginde joǵary orynda tur.
Qazaqstanda bastaýysh bilim berýmen qamtý deńgeıi 108,8-di quraıdy. Munyń ústine, Qazaqstanǵa jaqyn topta Frantsııa - 108, Avstralııa - 106, Koreıa - 104, Germanııa - 103 sekildi damyǵan elder bar. Aıtarlyqtaı tómen kórsetkishter Túrkııa - 99, Saýd Arabııasy - 98, AQSh - 98, Ýkraına - 97, Reseı - 96 sııaqty elderdiń enshisinde.
Qazaqstandaǵy orta bilimmen qamtý deńgeıi 98,5-ti quraıdy. Bul tipti 97 kórsetkishke ıe Koreıa, Shveıtsarııa - 96, Chehııa - 95, Ýkraına - 94 sekildi eldermen salystyrǵanda aıtarlyqtaı joǵary kórsetkish. Orta bilimmen qamtý kórsetkishi boıynsha budan da az deńgeı Grýzııada - 87, Túrkııada - 82, Qytaıda - 78.
Atalǵan kórsetkishter Qazaqstannyń bastaýysh jáne orta bilim berý júıelerinde tabysty jáne tıimdi damyp kele jatqanyna qosymsha aıǵaq bolyp tabylady.
Stýdentter men bilim alýshylardyń sany:
Damyǵan bilim berý júıeleriniń taǵy bir mańyzdy kórsetkishi 10 myń turǵynǵa shaqqandaǵy bilim alýshylardyń sany bolyp tabylady. Qazaqstanda bul kórsetkishter eń joǵary deńgeıde.
Mysaly, tehnıkalyq jáne kásibı bilim berý mekemelerinde (kolledjder men t.b.) oqyp jatqandar sany Qazaqstanda 10 myń turǵynǵa shaqqanda 368 adamnan keledi.
Bul kórsetkish boıynsha respýblıka EDYU elderi arasynda kóshbasshy pozıtsııada tur. Qazaqstan - 253 adam kórsetkishi bar Norvegııany jáne 237 adam kórsetkishi bar Reseıdi basyp ozǵan. Frantsııa - 180, Ulybrıtanııa - 135, Vengrııa - 71 sııaqty elder kórsetkishi múldem tómen.
Sondaı-aq Qazaqstan kóptegen álemdik derjavalardyń (Frantsııa, Ulybrıtanııa, Germanııa) turǵyndardyń 10 myńyna shaqqanda stýdentter sany boıynsha - 377 adamymen aıtarlyqtaı ozyp ketti. Bul tsıfr Frantsııada - 338, Ulybrıtanııada - 272, Japonııada - 222, Chehııada - 147, Ázerbaıjanda - 59 adamdy quraıdy.
"Astana aqshamy" gazeti
