Qazaqstan stýdentteri Estonııa ýnıversıtetterinen taǵylymdamadan ótedi

ASTANA. KAZINFORM — Qazaqstan stýdentteri Estonııa ýnıversıtetterinen taǵylymdamadan ótedi.  Bul týraly Ǵylym jáne joǵary bilim mınıstri Saıasat Nurbek aıtty.

- Estonııada negizgi 6 memlekettik ýnıversıtet bar. Biraq sapa jaǵynan, zertteý áleýeti jaǵynan óte myqty oqý oryndary. Búgin alǵash ret ekijaqty úkimetaralyq kelisimshartqa bizdiń mınıstrlik pen Estonııanyń Ǵylym jáne bilim mınıstrligi arasynda qol qoıamyz. Qazir ǵana arnaıy uıymdastyrylǵan konferentsııa aıasynda 6 memorandýmǵa qol qoıyldy. Osy memorandýmdardyń arqasynda stýdentter almasý, akademııalyq utqyrlyq oryn alady. Eń basty Tartý ýnıversıtetimen jáne Tallın tehnıkalyq ýnıversıtetimen taǵylymdama seriktesi retinde kelisimshart rásimdeldi, - dedi ol Aqordada BAQ ónimderiniń saýalyna oraı.

Onyń atap ótýinshe, Qazaqstannyń Estonııadan orta bilim salasynda da úıreneri bar.

- Ózderińizge málim, Estonııa PISA halyqaralyq salystyrmaly zertteýlerde TOP-5, TOP-3-ke dástúrli túrde kiredi. Sondyqtan osy saladaǵy eń myqty sarapshylar kelip, búgin birneshe semınar ótkizdi. Munan bólek, jasandy ıntellekti men tsıfrlandyrý salasynda arnaıy birneshe kelisimshartqa qol qoıyldy. Estonııa elektrondy qyzmet, elektrondy úkimet, jasandy ıntellekt salalarynda myqty pozıtsııada tur, - dedi mınıstr.

Aıta keteıik, búgin Aqordada Memleket basshysy Qasym-Jomart Toqaev pen Estonııa Prezıdenti Alar Karıs kelissóz ótkizedi.