Qazaqstan stýdentteri 30-dan astam ınnovatsııalyq IT-joba usyndy
ASTANA. KAZINFORM – Qazaqstan joǵary oqý oryndarynyń stýdentteri densaýlyq saqtaý, bilim berý, ınklıýzıvti orta, mádenıet, ekologııa, sotsıologııa jáne robototehnıka salalarynda 30-dan astam tsıfrlyq sheshimderin usyndy
AI-Sana baǵdarlamasy men Digital Nauryz tujyrymdamasy aıasynda L. N. Gýmılev atyndaǵy Eýrazııa ulttyq ýnıversıtetinde «ENU AI-Sana EXPO — 2.0» atty stýdentterdiń ınnovatsııalyq IT-jobalarynyń ІІ respýblıkalyq kórmesi ótti. Kórme barysynda Qazaqstan joǵary oqý oryndarynyń stýdentteri densaýlyq saqtaý, bilim berý, ınklıýzıvti orta, mádenıet, ekologııa, sotsıologııa jáne robototehnıka salalarynda 30-dan astam tsıfrlyq sheshimderin usyndy.
Іs-sharaǵa QR Ǵylym jáne joǵary bilim vıtse-mınıstri Dınara Şeglova, Tsıfrlyq úkimetti qoldaý ortalyǵy bas dırektorynyń birinshi orynbasary Araı Ýrazova, L. N. Gýmılev atyndaǵy EUÝ rektory Erlan Sydyqov, EUÝ tsıfrlandyrý jónindegi prorektory Gúlmıra Bekmanova, sondaı-aq ǵalymdar men stýdentter qatysty.
Vıtse-mınıstr Dınara Şeglova quttyqtaý sózinde ótken jylǵy ENU AI-Sana EXPO kórmesindegi kóptegen jobalar úkimettik jáne halyqaralyq deńgeıde joǵary baǵalanyp, búginde tabys ákelip otyrǵanyn aıtty.
— Sizder jobalardy tek ýnıversıtet úshin ǵana emes, ekonomıkanyń túrli salalary úshin júzege asyryp, olardyń damýyna úles qosyp otyrsyzdar. Bul — el bolashaǵyna qosqan úlesterińiz. Búgin bul startap bolýy múmkin, biraq dál osylaı iri jobalar paıda bolyp, keıin transulttyq kompanııalarǵa aınalady. Sizderge ınnovatsııalyq ári kreatıvti ıdeıalar tileımin, — dedi ol stýdentterge.
— Memleket basshysynyń strategııalyq maqsattarynyń biri — Qazaqstandy tsıfrlyq transformatsııalaý. Ony júzege asyrý joǵary bilikti mamandarsyz múmkin emes, al olardy ýnıversıtetter daıyndaıdy. Osyǵan baılanysty jastardyń jasandy ıntellekt tehnologııalaryna qyzyǵýshylyǵyn arttyrý erekshe mańyzdy. Bul kórme bilim berý salasyndaǵy tsıfrlyq sheshimderdi damytýǵa jáne joǵary oqý oryndary arasyndaǵy yntymaqtastyqty nyǵaıtýǵa baǵyttalǵan, — dep atap ótti EUÝ rektory Erlan Sydyqov.
Kórmede Eýrazııa ulttyq ýnıversıteti, Turan-Astana ýnıversıteti, M.Qozybaev atyndaǵy SQÝ jáne H.Dosmuhamedov atyndaǵy Atyraý ýnıversıteti stýdentteriniń jobalary usynyldy.
Kórme qorytyndysy boıynsha qazylar alqasy úzdik jobalardy anyqtap, olardyń avtorlaryn dıplommen jáne Lenovo jáne Platonus kompanııalarynyń baǵaly syılyqtarymen marapattady.
Úzdik jobalardyń biri — EUÝ stýdentteri Arman Lıaılıev pen Janııa Jumal ázirlegen joba boldy. Olar kompıýterlik kórý tehnologııasy arqyly qoqys aǵynyndaǵy plastık zattardy anyqtaıtyn júıe jasap shyǵardy. Model kameradan alynǵan beınelerdi taldap, naqty ýaqyt rejıminde plastıktiń bar-joǵyn anyqtaıdy jáne RIC júıesi boıynsha suryptaýǵa múmkindik beredi.
Sondaı-aq Ernur Jolaýshynyń jasandy ıntellekt negizinde qazaq tilindegi qoljazba mátindi taný jobasy erekshe qyzyǵýshylyq týdyrdy. Avtordyń aıtýynsha, joba aıasynda qazaq, orys jáne aǵylshyn tilderindegi qoljazbalardy joǵary dáldikpen tanıtyn veb-servıs ázirlengen.
Birinshi oryn alǵan jobalar:
«Qoqystan plastıkti anyqtaıtyn Luban robot-manıpýlıatory» — Arman Lıaılıev, Janııa Jumal;
«Kórý qabileti buzylǵan adamdarǵa arnalǵan navıgatsııalyq kómekshi» — Arýjan Tájibaı;
«SUNKAR AI» — qurylǵylar men drondardy dál nysana anyqtaý júıesine aınaldyratyn platforma — Bolat Abdýlazız;
«RUNA Sozdik AI» — Amanjol Askarov, Dana Baqytqan.
Ekinshi oryn alǵan jobalar:
«Qoljetimsiz jerlerde óndiristik dánekerleý» — Ashat Ábdimýtalıp, Oljas Erkinuly;
«Ósimdik óskinderiniń sapasyn aqyldy taldaý jáne baqylaý» — Erasyl Tóreǵalı, Mıhaıl Meırmanov, Nurlan Ernazar;
«Inklıýzıvti ortada qaýipsizdik buzýshylyqtaryn anyqtaıtyn ıntellektýaldy júıe» — Gúlnaz Nadırhan, Aqnazar Bekbaý;
«AdaptiveHand» — qol qımyly arqyly kompıýterdi basqarý júıesi — Nurly Ǵalym;
«LibAU AI Assistant» — ǵylymı kitaphana qyzmetin jańǵyrtýǵa arnalǵan veb-qosymsha — Rıshat Rashıtov;
«Elib» elektrondy kitaphanasy — Erasyl Baqytjanuly;
«KUtrack» jobalardy basqarý platformasy — Elnur Aıaǵan;
«Intellektýaldy beınebaqylaý júıesi» — Aıaýlym Murat, Alı Taberhan;
«Jalǵan jańalyqtardy anyqtaý júıesi» — Aqsáýle Nazymhan.
Úshinshi oryn alǵan jobalar:
«Dombyra áýenderin AI arqyly mýzykalyq transkrıptsııalaý» — Álibı Qabıden;
«Qazaq tilindegi qoljazbany taný júıesi» — Ernur Jolaýshy;
«DETECT AI» dálelderdi taldaý júıesi — Janel Baıǵanına;
Debattar men sot otyrystaryn taldaıtyn AI-agent — Nazgúl Dospol;
«FinAIMen» stýdenttiń qarjylyq turaqtylyǵyna arnalǵan AI-navıgatsııa — Leıla Belgıbaeva, Jýldyz Mýhtar, Laýra Shaımanova;
«Pnevmonııany anyqtaıtyn ıntellektýaldy júıe» — Eldar Saǵyndyqov;
«Aqyldy úı» júıesi — Aqlıma Meırambek;
«Ym-ıshara tilin taný júıesi» — Jamal Gazız;
«„Qazposhta“ hattaryn suryptaý» — Raıymbek Ábilqaıyr, Nurlan Taıshybaev;
«Avtosalaǵa arnalǵan alıýmınııdi lazerlik kesý» — Berik Qanatbek, Erasyl Taýbekov.
Arnaıy nomınatsııalar:
«Taý-ken ónerkásibi úshin úzdik ázirleme» — «Paıdaly qazbalardy avtomatty túrde sáıkestendirý jáne suryptaýdyń robottandyrylǵan júıesi» jobasy — Farhat Togtasan men Mıras Toktarbek;
«Úzdik ekologııalyq joba» — «Elektrondyq qaldyqtardy avtomattandyrylǵan suryptaý» — Jasulan Berdimurat pen Madııar Abdykalıkov;
«Sapa boıynsha úzdik ázirleme» — «Sandyq tańbalardy taný negizinde sapany baılanyssyz baqylaýdyń ıntellektýaldy robottandyrylǵan júıesi» jobasy — Arslan Abashev pen Jansaıa Abdýrahman.
Aıta ketelik Astana Hub qurylys salasynda 32 ınnovatsııalyq jobany iske asyryp jatyr.