Qazaqstan stýdenti Shenchjendegi WorldSkills týrnırinde top jardy
ASTANA. KAZINFORM — Qytaı Halyq Respýblıkasynyń Shenchjen qalasynda ónerkásiptik dızaın tehnologııalary boıynsha WorldSkills Industrial Design Technology International (Shenzhen) Invitational Tournament halyqaralyq týrnıri ótti. Bul týraly Oqý-aǵartý mınıstrligi málim etti.
Halyqaralyq deńgeıdegi bedeldi dodaǵa Qazaqstan, Qyrǵyzstan, Malaızııa, Saýd Arabııasy jáne Qytaı elderiniń jas mamandary qatysty. ️Qazaqstan namysyn Pavlodar qalasyndaǵy Aqparattyq tehnologııalar kolledjiniń úshinshi kýrs stýdenti, «Ónerkásiptik dızaın» quzyreti boıynsha WorldSkills Kazakhstan–2025 ulttyq chempıonatynyń jeńimpazy Darıa Melnık qorǵady. ️Baıqaý barysynda qatysýshylar ónerkásiptik dızaın salasyndaǵy kásibı quzyretterin, ınnovatsııalyq oılaý qabiletin jáne praktıkalyq daǵdylaryn synady. ️
— Nátıjesinde Darıa Melnık І oryndy ıelenip, halyqaralyq týrnırdiń absolıýtti jeńimpazy atandy. Stýdentti jarysqa Aqparattyq tehnologııalar kolledjiniń oqytýshysy Borıs Grıgorev daıyndady, — delingen habarlamada.
Qazaqstandyq stýdenttiń bul jetistigi tehnıkalyq jáne kásiptik bilim berý júıesiniń sapasy men otandyq jastardyń halyqaralyq deńgeıdegi básekege qabilettiligin kórsetti. Sonymen qatar elimizdiń WorldSkills qozǵalysyndaǵy áleýetin aıqyndap, qazaqstandyq mamandardyń kásibı sheberligi álemdik deńgeıde joǵary baǵalanatynyn dáleldedi.
Aıta keteıik, buǵan deıin qazaqstandyq oqýshylar AQSh-taǵy halyqaralyq robototehnıka týrnırlerinde top jarǵan bolatyn.
