Qazaqstan strategııalyq zertteýler ınstıtýty Ortalyq Azııadaǵy eń úzdik analıtıkalyq ortalyq atandy
28 qańtarda Pensılvanııa ýnıversıtetiniń álemdegi ǵylymı-saraptamalyq ortalyqtarynyń «Global Go To Think Tank Index Report» jyl saıynǵy reıtıngi usynyldy, ol «aqyl-oı ortalyqtarynyń» eń bedeldi álemdik reıtıngi bolyp sanalady. Reıtıng professor Djeıms MakGannyń jetekshiligimen «Aqyl-oı ortalyqtary jáne azamattyq qoǵam» baǵdarlamasy sheńberinde jasalady. Ol qurylǵaly beri 15-shi ret ótkizilip otyr.
2020 jyly Pensılvanııa ýnıversıteti álemdegi 11 175 aqyl-oı ortalyǵynyń qyzmetin taldady, onyń ishinde 43 ortalyq Qazaqstannan boldy.
«Jalpy, reıtıng baǵalanatyn ortalyqtar, sondaı-aq ekonomıkalyq jáne saıası zertteýler salasyndaǵy 4 myńǵa jýyq maman, saıasatkerler men jýrnalısterge júrgizilgen saýalnama nátıjesi negizinde qurylady. Reıtıngini qalyptastyrýdyń sońǵy kezeńine bedeldi sarapshylar toby qatysady, olardyń pikiri negizinde qorytyndy reıtıng shyǵarylady. Reıtıngini qalyptastyrý úshin aqyl-oı ortalyqtaryn ǵylymı-taldamalyq jumystyń sapasy men bedeline, fýnktsıonaldyq jáne uıymdastyrýshylyq baǵytyna, konferentsııalar, brıfıngiler jáne resmı kezdesýler ótkizetin ortalyqtyń tanymaldyǵyna, sondaı-aq erekshe júldeler týraly málimetterge negizdelgen qurylmdaıtyn 30-dan astam túrli krıterıı qoldanylady», delingen habarlamada .
2020 jyldyń qortyndysy boıysha QR Prezıdentiniń janyndaǵy Qazaqstan strategııalyq zertteýler ınstıtýty kezekti ret Ortalyq Azııadaǵy eń úzdik saraptama ortalyǵy bolyp tanyldy.
«Ortalyq Azııadaǵy jetekshi aqyl-oı ortalyqtary» nomınatsııasyna 10 qazaqstandyq analıtıka ortalyǵy kirdi. 2020 jyly «Global Go To Think Tank Index» esebinde usynylǵan barlyq qazaqstandyq saraptama ortalyqtary pozıtsııalaryn jaqsartty: QR Ulttyq ekonomıka mınıstrliginiń Ekonomıkalyq zertteýler ınstıtýty (6 oryn), QR Qorǵanys jáne aeroǵarysh ónerkásibi mınıstrliginiń Ortalyq Azııanyń áskerı-strategııalyq zertteýler ortalyǵy (16 oryn), Qoǵamdyq máselelerdi taldaý ortalyǵy (25 oryn), QR BǴM Ǵylym komıteti R.B. Súleımenov atyndaǵy Shyǵystaný ınstıtýty (37 oryn), Qazaqstan menedjment, ekonomıka jáne boljaý ınstıtýty (39 oryn), Álemdik ekonomıka jáne saıasat ınstıtýty (41 oryn), «Nur Otan» partııasy Saıası taldaý jáne strategııalyq zertteýler ortalyǵy (44 oryn).
«Energetıkalyq jáne resýrstyq saıasat boıynsha jetekshi aqyl-oı ortalyqtary» nomınatsııasy boıynsha QSZI 31-orynǵa ıe boldy (barlyǵy usynylǵan - 60 ortalyq), «Qorǵanys jáne ulttyq qaýipsizdik salasyndaǵy jetekshi aqyl-oı ortalyqtary» reıtınginde QSZI 97-oryndy saqtap qaldy (usynylǵan barlyǵy - 110 ortalyq).
2020 reıtınginiń jańalyǵy - bul COVID-19-tyń aqyl-oı ortalyqtarynyń qyzmetine áseri jáne olardyń álemdik pandemııaǵa reaktsııasy. Bul jańa nomınatsııa «2020 jyly COVID-19-ke qatysty úzdik saıasat jáne ınstıtýtsıonaldy jaýap». kórinis tapty: Sarapshylar bul nomınatsııaǵa álemniń túkpir-túkpirinen 83 analıtıkalyq ortalyqty qosty, olardyń arasynda QSZI Qazaqstan men Ortalyq Azııa elderinen kirgen jalǵyz qurylym boldy.
