Qazaqstan strategııalyq zertteýler ınstıtýty ǵylymı-tájirıbelik konferentsııa ótkizdi

ASTANA. QazAqparat – QR Prezıdenti janyndaǵy Qazaqstan strategııalyq zertteýler ınstıtýty, Máskeý Memlekettik halyqaralyq qatynastar ınstýty jáne Qazaqstannyń Reseıdegi Elshiligi Qazaqstan Respýblıkasy men Reseı Federatsııasy arasyndaǵy dıplomatııalyq qarym-qatynastardyń ornatylýyna 30 jyl tolýyna arnalǵan ǵylymı-tájirıbelik konferentsııa ótkizdi.

Konferentsııaǵa MMHQI rektory Anatolıı Torkýnov, Qazaqstannyń Reseıdegi Tótenshe jáne Ókiletti Elshisi Ermek Kósherbaev, QR Prezıdent janyndaǵy QSZI dırektory Erkin Tuqymov, Reseı Syrtqy ister mınıstriniń orynbasary Andreı Rýdenko, Qazaqstan Syrtqy ister mınıstriniń orynbasary Ermuhambet Qonyspaev, sondaı-aq Qazaqstan men Reseıdiń jetekshi taldaý ortalyqtarynyń sarapshylary qatysty.

Konferentsııa Qazaqstan men Reseı arasyndaǵy strategııalyq áriptestiktiń damýy men bolashaǵyna, sondaı-aq jahandyq jáne aımaqtyq syn-qaterler men eki el arasyndaǵy yntymaqtastyqty taldaýǵa arnaldy.

Jalpy sarapshylar álemdik saıasattaǵy úrdister men ózgerister, óńirlik qaýipsizdik máseleleri boıynsha pikir almasyp, ǵylymı-zertteý salasyndaǵy yntymaqtastyqtyń perspektıvalaryn talqylady.