Qazaqstan strategııalyq zertteýler ınstıtýty álemdik saraptamalyq ortalyqtardyń 2014 jylǵy reıtıngisinde úzdikter qatarynan kórindi
ASTANA. QazAqparat - Saraptamalyq ortalyqtardyń 2014 jylǵa arnalǵan álemdik ındeks-reıtıngisinde QR Prezıdenti janyndaǵy Qazaqstan strategııalyq zertteýler ınstıtýty (QSZI) Kavkaz, Ortalyq jáne Ońtústik Azııa elderi ortalyqtarynyń arasynda úzdik úshtikke enip otyr.
Bul týraly atalǵan QSZI baspasóz qyzmeti habarlady.
Sondaı-aq, energetıka jáne shıkizat saıasaty salasyndaǵy álemdik saraptamalyq ortalyqtar arasynda alǵashqy otyzdyqtan kórindi. Olardyń arasynda REND korporeıshn (5-oryn), Amerıkandyq Strategııalyq jáne halyqaralyq zertteýler ortalyǵy - CSIS (11-oryn), Brıtanııanyń energetıkalyq qaýipsizdik máseleler jónindegi zertteý ortalyǵy - EUCERS (18-oryn) sııaqty saraptamalyq qurylymdar bar.
Atalǵan reıtıng Pensılvanııa ýnıversıtetiniń «Saraptamalyq ortalyqtar jáne azamattyq qoǵam» atty zertteý baǵdarlamasy aıasynda túziledi. Saraptamalyq qurylymdardyń jetistikterine qaraı baǵalaý 1989 jyldan beri júrgizilip keledi. Zertteýge álemniń barlyq óńirinen 6500-den asa «aqyl-oı» ortalyqtary alynady.
2014 jyldyń reıtıngisi men atalymdary mynadaı ólshemder negizinde túzildi:
- Ǵylymı-saraptamalyq jumystardyń sapasy men bedeli: joǵary sapaly, obektıvti, saıası zertteýler. Jáne onyń memleket basshylyǵyna, BAQ pen qoǵamǵa qoljetimdiligi;
- Ortalyq qyzmetkerleriniń kásibıligi men abyroıy: biliktiligi joǵary, tájirıbeli ǵalymdar men sarapshylardy jınaýy, zertteýler salasynda moıyndalǵan mamandardy tartýy;
- Júrgizilgen zertteýlerdiń ǵylymı obektıvtiligi, ortalyqtyń ǵalymdary men sarapshylarynyń resmı attestatsııasy, ǵylymı jarııalanymdardyń sapasy men túrleri - kitap, jýrnal, konferentsııalar materıaldary, ǵylymı jáne kásibı is-sharalardaǵy baıandamalardyń, ortalyq mamandary jazǵan ǵylymı maqalalardyń sany;
- Naqty baǵdarlamalarǵa, brıfıngter men resmı kezdesýlerdiń sanyna, saıası materıaldardyń shyǵýyna baılanysty tanymaldyǵy;
- Zertteýlerdiń nátıjesin taratý maqsatynda elektrondy jáne dástúrli aqparat quraldaryn paıdalana bilý men negizgi aýdıtorııamen baılanys ornatýy.
Aıta keteıik, 2013 jylǵy reıtıng boıynsha da QSZI Kavkaz, Ortalyq jáne Ońtústik Azııa elderiniń saraptamalyq ortalyqtarynyń ishinde aldyńǵy qatardan oryn alǵan bolatyn.
QSZI Qazaqstan Respýblıkasy Prezıdentiniń Jarlyǵymen 1993 jyldyń 16-maýsymynda ashylǵan. Instıtýttyń qurylǵan sátinen bergi negizgi mindeti - memlekettik ǵylymı-zertteý mekemesi retinde QR Prezıdentiniń jumysyn ǵylymı-saraptamalyq turǵyda qamtamasyz etý.
