Qazaqstan strategııalyq tsıfrlyq maınıng tetigin engizip jatyr
ASTANA. KAZINFORM – Jasandy ıntellekt jáne tsıfrlyq damý mınıstrligi strategııalyq tsıfrlyq maınıngti júzege asyrý qaǵıdalaryn ázirledi.
Atalǵan qaǵıdalar Qazaqstan Respýblıkasy Úkimetiniń qaýlysymen bekitildi. Jańa tetik tsıfrlyq maınıng salasyndaǵy iri ınvestıtsııalyq jobalardy iske asyrýǵa qosymsha yntalandyrýlar jasaýǵa, salanyń ınvestıtsııalyq tartymdylyǵyn arttyrýǵa jáne Qazaqstandaǵy tsıfrlyq aktıvter ındýstrııasyn odan ári damytýǵa baǵyttalǵan.
Strategııalyq tsıfrlyq maınıng baǵdarlamasyna qatysý erikti negizde júzege asyrylady.
Strategııalyq tsıfrlyq maıner mártebesin tek Qaǵıdalarda belgilengen talaptarǵa sáıkes keletin jáne tıisti ótinim bergen tsıfrlyq maınıng sýbektileri ǵana ala alady.
Ashyqtyq pen obektıvtilikti qamtamasyz etý maqsatynda ótinimder Jasandy ıntellekt jáne tsıfrlyq damý mınıstrligi janyndaǵy Komıssııada múddeli memlekettik organdar ókilderiniń qatysýymen qaralady. Strategııalyq tsıfrlyq maıner mártebesin berý týraly sheshim usynylǵan materıaldardy jan-jaqty qaraý qorytyndysy boıynsha qabyldanady.
Strategııalyq tsıfrlyq maıner mártebesin alǵan kompanııalar elektr energııasyn óndirýshi uıymdarmen Qazaqstan Respýblıkasynyń zańnamasynda belgilengen shekti tarıften aspaıtyn baǵamen 10 jylǵa deıingi merzimge elektr energııasyn satyp alý-satý týraly tikeleı sharttar jasasýǵa múmkindik alady.
Óz kezeginde, baǵdarlamaǵa qatysýshylar Ulttyq strategııalyq krıptorezervke óndirilgen tsıfrlyq aktıvterdiń jalpy kóleminiń 10%-yn emes, Qaǵıdalarda belgilengen tártippen elektr energııasyn satyp alý men jetkizýge jumsalǵan shyǵyndar esepke alynǵannan keıin qalǵan tsıfrlyq aktıvterdiń 10%-yn aýdarady.
Ulttyq strategııalyq krıptorezervti qalyptastyrý bıýdjet qarajatyn paıdalanbaı júzege asyrylady.
Rezerv strategııalyq tsıfrlyq maınerlerdiń baǵdarlamaǵa erikti túrde qatysýy esebinen ǵana tolyqtyrylatyn bolady. Bul memleketke tsıfrlyq aktıvterdiń strategııalyq qoryn qalyptastyrýǵa múmkindik beredi.
— Biz Qazaqstanda tsıfrlyq aktıvterdi damytý úshin básekege qabiletti ári ınvestıtsııalyq tartymdy ıýrısdıktsııany kezeń-kezeńimen qalyptastyryp kelemiz. Strategııalyq tsıfrlyq maınıng ınstıtýtyn engizý — osy baǵyttaǵy taǵy bir mańyzdy qadam, — dep atap ótti Qazaqstan Respýblıkasy Jasandy ıntellekt jáne tsıfrlyq damý mınıstrliginde.
Aıta ketelik Qazaqstan paıdalanylmaı jatqan gazdy tsıfrlyq maınıngke qoldanbaq.
