Qazaqstan statıstıkamen jumys isteýge arnalǵan AI-kómekshini iske qosty
ASTANA. KAZINFORM – QR SJRA Ulttyq statıstıka bıýrosy tsıfrlyq transformatsııa aıasynda «AI Stat» atty vırtýaldy kómekshini iske qosqanyn habarlady. Jasandy ıntellekt negizinde ázirlengen bul servıs statıstıkalyq derektermen jumysty jeńildetip, tsıfrlyq platformalardy paıdalanýshylarǵa túsetin júktemeni azaıtady. Ol eseptilik aqparatynda jyldam baǵdar alýǵa, qajetti málimetterdi ońaı tabýǵa jáne Bıýronyń baılanys ortalyǵyna júginbeı-aq túrli qyzmetterdi paıdalanýǵa múmkindik beredi.
Joba 2026 jyldyń sáýir aıynda pılottyq rejımde iske qosylyp, paıdalanýshylar tájirıbesi negizinde jetildirildi. Nátıjesinde bilim qory keńeıtilip, suranystardy óńdeý algorıtmderi ońtaılandyryldy, jaýaptyń dáldigi men tolyqtyǵy artty.
«AI Stat» Bıýronyń tsıfrlyq servıster ekojúıesine tolyq biriktirilgen jáne respondentter men statıstıkalyq aqparat paıdalanýshylary úshin yńǵaılylyqty arttyrýǵa baǵyttalǵan. Ol bir ǵana ınterfeıs arqyly keńes berý, derekterdi izdeý jáne eseptilikpen jumys isteýge arnalǵan qoldaý qyzmetterin biriktiredi.
Kómekshi dıalog formatynda jumys isteıdi jáne paıdalanýshyny negizgi kezeńderde súıemeldep otyrady. Servıs statıstıkalyq eseptilikke qatysty suraqtarǵa jaýap beredi, esep nysandaryn toltyrýǵa kómektesedi jáne qatelik jiberý yqtımaldyǵyn azaıtady. Sonymen qatar ol derekterdi izdeýdi jeńildetip, Bıýronyń tsıfrlyq resýrstarynda, sonyń ishinde Respondent kabınetinde yńǵaıly navıgatsııa jasaýǵa múmkindik beredi.
Budan bólek, «AI Stat» BSN nemese JSN arqyly mindetti statıstıkalyq nysandardyń «Júgirtpe» tizimin qalyptastyrady, qyzmet túrin tańdaǵan kezde EQJJ kodtaryn usynady jáne qajet bolǵan jaǵdaıda ótinishti baılanys ortalyǵyna joldaıdy. Bul kúndelikti qaıtalanatyn protsesterdi avtomattandyryp, aqparatqa qol jetkizý jyldamdyǵyn arttyrady.
Jalpy alǵanda, servıs birinshi deńgeıli qoldaý qyzmetin atqaryp, operatorlarǵa túsetin júktemeni azaıtady jáne bıznes pen azamattardyń qajetti aqparatty alý ýaqytyn qysqartady.
– Paıdalanýshylar búginde derekterge tez ári jeńil qoljetimdilikti kútedi. AI Stat - bıýronyń tsıfrlyq transformatsııasynyń jáne memlekettik sektorda jasandy ıntellekt sheshimderin damytý baǵytynyń bir bóligi. Ol statıstıkaǵa qatysty suraqtarǵa birneshe qadam arqyly jaýap alýǵa múmkindik beredi, kúrdeli júıelerdi tereń túsinýdi qajet etpeıdi. Bul - alǵashqy kezeń, al aldaǵy ýaqytta biz kómekshiniń múmkindikteri men qoldaný aıasyn keńeıtetin bolamyz, – dedi Ulttyq statıstıka bıýrosynyń basshysy Maqsat Turlybaev.
Servıs qazirgi ýaqytta eki tilde qoljetimdi. Aldaǵy ýaqytta onyń aǵylshyn tilindegi nusqasyn da iske qosý josparlanyp otyr. AI Stat-ty damytý elimizdegi memlekettik qyzmetterdi tsıfrlandyrý jáne jasandy ıntellekt sheshimderin engizý baǵytyndaǵy júıeli jumystyń bir bóligi bolyp sanalady.
Eske salaıyq, Qazaqstanda Imam AI iske qosylady. Tsıfrlyq ımamǵa qandaı suraq qoıýǵa bolatynyn jazǵan bolatynbyz.
