Qazaqstan Statıdiń bastapqy isine qatysty Shvetsııa sheshimine daýlasa ma

NUR-SULTAN. QazAqparat – Qazaqstan Shvetsııanyń Statıdiń bastapqy isine qatysty sheshimine daýlasa ma? Bul saýalǵa búgin QR Ádilet mınıstri Marat Beketaev jaýap berdi, dep habarlaıdy QazAqparat tilshisi.

«Mine, Statıdiń bir de bir protseste jeńe almaǵanyna bir jyldan astam ýaqyt ótti. Barlyq ıýrısdıktsııalardaǵy sheshimder túgel Qazaqstannyń paıdasyna qabyldanyp jatyr. 500 mln dollar somasyna bastapqy sheshimge qatysty aıtar bolsam, bul sheshimde qaıta ashylǵan mán-jaıǵa baılanysty daýlasýǵa bolady. Mundaı mán-jaı ıýrısdıktsııalardyń birindegi sot sheshimi bola alady. Áńgime AQSh nemese Eýropa elderi jaıynda bolyp otyr. Sot bizdiń alaıaqtyqqa aıyptaýymyz boıynsha sheshim qabyldasa, eger sot alaıaqtyqty tanıtyn bolsa, onda bul qaıta ashylǵan mán-jaı sanalady. Sonymen Shvetsııaǵa barýǵa bolady», - dedi Marat Beketaev Ortalyq kommýnıkatsııalar qyzmetinde BAQ ókilderiniń saýalyna oraı.

Aıta keteıik, 11 naýryzda Anglııanyń Joǵarǵy soty Statı tarapynyń Qazaqstan Respýblıkasy men Qazaqstan Ulttyq bankine 3,7 mln AQSh dollarynan astam sot shyǵynyn tóleýge mindetteıtin sot buıryǵynyń kúshin joıýǵa qatysty ótinishin qabyldamaý týraly sheshim shyǵarǵan edi.