Qazaqstan standarttaý jónindegi halyqaralyq uıym keńesiniń quramyna kirdi
ASTANA. QazAqparat - Standarttaý jónindegi ISO halyqaralyq uıymy Bas assambleıasynyń 40-shy sessııasynda Qazaqstan 2018-2020 jyldar kezeńinde ISO Keńesiniń quramyna alyndy, dep habarlaıdy QR IDM baspasóz qyzmeti.
Bul halyqaralyq standarttaý júıesin damytýda mańyzdy sheshimder qabyldaý sharalaryna qatysýǵa múmkindik beredi. ISO-nyń 162 múshesi bar. ISO Keńesi 20 qatysýshydan turady (6 turaqty jáne 14-i tańdalady).
QR IDM Tehnıkalyq retteý jáne metrologııa komıtetiniń tóraǵasy Ǵalymjan Duǵalovtyń basshylyǵymen barǵan delegatsııa Germanııada ótip jatqan halyqaralyq standarttaý aptalyǵy aıasynda Assambleıa jumysyna belsendi qatysýda.
Іs-shara aıasynda Indýstrııa 4.0 ónerkásibi men ınnovatsııa salasy boıynsha standarttar ázirleýdiń ózekti máselelerin talqylaý josparlanýda. Sondaı-aq, ISO jarııalanymyn jańǵyrtý men satylym jáne avtorlyq quqyqty qorǵaý, ISO protsedýralyq tártibi men jarǵydaǵy ózgeristerdi taratý boıynsha ISO-nyń jańartylǵan saıasaty tanystyrylatyn bolady. Standarttaý men basqa da salalarǵa jas býyndy tartý máselesi de talqylanatyn bolady.
ISO 2017 Bas Assambleıasynda QR IDM Tehnıkalyq retteý jáne metrologııa komıteti men Avstrııanyń Standarttar Instıtýty arasynda Jol kartasyn iske asyrý jónindegi yntymaqtastyq týraly memorandýmǵa qol qoıylady, dep josparlanǵan. Sondaı-aq, nemistiń, chehtyń jáne túriktiń standarttaý jónindegi organdarymen ekijaqty kelisimder men memorandýmdarǵa qol qoıylady.
