Qazaqstan standarttaý jáne sertıfıkattaý ınstıtýtyna 15 jyl toldy

ASTANA. 12 qazan. QazAqparat -  QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetinde Qazaqstan standarttaý jáne sertıfıkattaý ınstıtýtynyń 15 jyldyq mereıtoıyna jáne Dúnıejúzilik standarttar kúnine oraı konferentsııa ótti.

«Qazaqstan standarttaý jáne sertıfıkattaý ınstıtýty» respýblıkalyq memlekettik kásiporny ótken 15 jyl ishinde respýblıkada ónimniń, jumystar men kórsetiletin qyzmetterdiń sapasy men qaýipsizdigin tehnıkalyq retteýge arnalǵan zańnamalyq negizder men normatıvtik bazany damytý jáne jetildirý boıynsha mindetterdi oryndaý jáne olardy halyqaralyq talaptarmen úılestirý maqsatynda óz qyzmetin júzege asyryp keledi. Instıtýt Tehnıkalyq retteý jáne metrologııa komıteti vedomstvosyna qarasty kásiporyn retinde qurylǵan bolatyn. Oblys ortalyqtarynda 16 fılıaly bar. Qazaqstan jas táýelsiz memleket retinde álemdik ekonomıkalyq qoǵamdastyqqa kirý boıynsha belsendi ıntegratsııalyq úderisterdi júzege asyra bastaǵan kezde atalmysh  qurylymdy qurý barynsha mańyzdy mindet boldy. Osy faktor Otanymyzdyń ekonomıkasynyń barlyq salalarynda tehnıkalyq retteý máselelerin qaıta qaraýdy talap etti, bul keıinnen tehnıkalyq retteý júıesin reformalady. Qazaqstan Respýblıkasynyń atynan halyqaralyq deńgeıde shyǵa alatyn mamandardy, standarttaý jáne sertıfıkattaý salasyndaǵy kadrlardy daıarlaýǵa jáne qaıta daıarlaýǵa barynsha qajettilik týyndady», - delingen baspasóz aıǵaǵynda.  

 Standarttaý salasyndaǵy halyqaralyq yntymaqtastyqtardy damytý maqsatynda, qazaqstandyq standarttardyń dárejesin arttyrýǵa standarttaýdyń ulttyq júıesin halyqaralyq, óńirlik jáne shetelderdiń údemeli ulttyq standarttaý júıesimen úılestirý úshin «Qazaqstan standarttaý jáne sertıfıkattaý ınstıtýty» kásiporny standarttaý jónindegi ulttyq organdarmen kelisimder jasasqan. Atap aıtqanda, ınstıtýt búgingi kúni Amerıka ulttyq standarttar ınstıtýty (ANSI), Nemis standarttaý ınstıtýty (DIN), Amerıka ınjener-mehanıkter qoǵamy (ASME), Amerıka materıaldardy synaý qoǵamy (ASTM), Brıtanııa standarttar ınstıtýty (BSI) sekildi qurylymdarmen belsendi yntymaqtastyqta.

Instıtýt halyqaralyq standarttardy úılestirý úderisinde úlken rol atqardy. Instıtýt Qazaqstannyń Standarttaý jónindegi halyqaralyq uıymnyń jumystaryna belsene qatysady, ISO-nyń 16 tehnıkalyq komıtetiniń tolyq quqyly múshesi jáne 8 qosalqy komıtetinde qadaǵalaýshy-múshesi bolyp tabylady. Osy jyldar ishinde Instıtýtta Standarttar men tehnıkalyq reglamentterdiń memlekettik qory qurylǵan.

Toqtala ketetin jaıt, 14 qazanda jyl saıyn búkil álem Dúnıejúzilik standarttar kúnin atap ótedi. Bul rette ár jylda kóteriletin uran da ártúrli. Al bıylǵy jyldyń urany: «Shyǵyndy azaıtyp, jaqsy nátıjege qol jetkizemiz».