Qazaqstan «Spoı» telejobasy engizilgen álemdegi ekinshi el- baspasóz máslıhaty
ALMATY. 2 Qarasha. QazAqparat /Názıra Eleýhan/- Bıyl 2 qarashadan bastap «Habar» telearnasynda án salýǵa yntyqqan jandardyń jolyn ashatyn jańa «Spoı» atty televızııalyq joba kórermenge jol tartady. Efırge alǵashqy habar 6 qarashada shyǵady. Qazaqstan, Gollandııa elinen keıingi «Spoı» telejobasy engizilgen álemdegi ekinshi el. Qazaq televıdenıesi tarıhynda buǵan uqsas habar bolǵan emes. Bul týraly búgin Almatyda ótken arnaıy baspasóz máslıhatynda aıtyldy.
Uıymdastyrýshylardyń pikirinshe, bul televızııa álemin dúr silkindiretin aýqymdy joba bolmaq. Eshqandaı telejobalarǵa uqsamaıtyn «Spoı» qazaq televıdenıesine ózindik qoltańbasymen enbek.
"Jobaǵa qalaǵan adamyna arnaý retinde án joldaǵysy kelgen, vokaldyq qabileti bar kez kelgen adam qatysa alady. Ol úshin stýdııaǵa kelip, basynan ótken oqıǵasyn baıandap berýge tıis. Onyń basynan ótken oqıǵasy jelisinde án mátini jazylyp, baıqaýǵa qatysýshy efırge sol ánimen shyǵady. Baıqaýdyń basty sharty - án joldanǵan adamnyń kórermender qatarynan tabylýy tıis",-deıdi jobanyń prodıýseri Ámir Sadyqov. Onyń aıtýynsha búgingi tańda kastıngke 70-ten asa adam qatysqan.
"Habar" telearnasynyń kreatıv jónindegi dırektory Erjan Súleımenovtyń aıtýynsha joba «Talpa» kompanııasymen birigip jasalynýda. "Bul óte aýyr, aýqymdy oıyn-saýyqtyq joba. Áriptesterimizben birge jasalynatyn teleónim sapaly bolyp shyǵýǵa yqpal etedi. Bul otandyq televızııa naryǵynyń damýyna salatyn úlken úlesimiz. Mýzykalyq shoý jańarǵan "Habar" telearnasynyń formatyna saı keledi degen senimdemin", -dedi ol.
Shoý «Habar» arnasynyń efırinen ár senbi kúni keshki saǵat 21.30-da kórsetiletin bolady. Kórermender bir baǵdarlama aıasynda 7 úmitkerdiń sahnaǵa shyqqanyn kóre alady. Habardyń júrgizýshisi - Qymbat Hangeldına.
