Qazaqstan sportynyń damýyna zor úles qosqan A.Vınokýrov marapatqa ıe boldy
Arnaıy belgini búgin QR Mádenıet jáne sport mınıstri Arystanbek Muhamedıuly dańqty sportshyǵa ózi tabystady.
«Men «QR-da dene tárbıesi men sportty damytýǵa sińirgen eńbegi úshin» atalatyn erekshe mártebeli belgini Olımpıada chempıony Aleksandr Vınokýrovqa tabys etkim keledi», - dedi ol veloshabandozǵa qarata.
«Nıetterińizge, syılyqtaryńyzǵa zor alǵys bildirgim keledi. Ol meniń medaldar jınaǵymdy keńeıte túsetin boldy. Bul nagradany sizdiń qolyńyzdan alǵanyma qýanyshtymyn jáne sizdi qyzmetke taǵaıyndalýyńyzben quttyqtaımyn», - dedi óz kezeginde A.Vınokýrov.
Sonymen qatar A.Muhamedıuly kezdesý barysynda qazaqstandyq komandany jáne onyń kapıtany Vınchentso Nıbalıdi Týr-de-Frans kópkúndigindegi tamasha jeńisterimen quttyqtady.
«Men Astanaǵa kelgenime óte qýanyshtymyn jáne komanda músheleriniń qoltańbasy qoıylǵan kóshbasshynyń sary jeıdesin sizge syılaǵym keledi», - dedi V.Nıbalı mınıstrge.
