Qazaqstan sportynyń ardagerleri marapattaldy
ASTANA. QazAqparat - QR Ulttyq Olımpıada komıtetiniń qurylǵanyna 25 jyl tolýyna oraı qazaqstandyq olımpıadalyq qozǵalys ardagerleriniń qatysýymen saltanatty shara ótti, dep habarlaıdy QazAqparat.
Mereıtoılyq sharaǵa Olımpıada oıyndarynyń, álem chempıonattarynyń jáne ózge de joǵary sanattaǵy halyqaralyq jarystardyń birneshe dúrkin jeńimpazdary men júldegerleri, sonymen qatar Qazaq KSR-i men Qazaqstan Respýblıkasynyń eńbek sińirgen mádenıet jáne sport qaıratkerleri shaqyryldy. Oǵan sondaı-aq QR Ulttyq Olımpıada komıtetiniń basshylyǵy qatysty.
«Táýelsiz Qazaqstannyń olımpıadalyq qozǵalysy men sportyn damytýǵa aıryqsha eńbek sińirgen ardagerler Ulttyq Olımpıada komıtetiniń mereıtoılyq medaldarymen marapattaldy. Máselen, nagradany Jeńil atletıkadan KSRO-nyń eńbek sińirgen sport sheberi, Eýropa kýbogynyń jeńimpazy, KSRO chempıonattarynda 10-nan astam ret jeńiske jetken Ámın Tuıaqov; jeńil atlet, QR Týrızm jáne sport akademııasynyń professory, qurmetti jattyqtyrýshy, Melbýrnda ótken 1956 jylǵy Olımpıada oıyndarynda Qazaq KSR-i atynan eń birinshi bolyp óner kórsetken Evgenıı Kadıaıkın; konkımen júgirý sportynan KSRO-nyń eńbek sińirgen jattyqtyrýshysy, KSRO men Qazaqstannyń 100-den astam talanatty sportshysyn daıyndaǵan Maı Hvan bar», - delingen Ulttyq Olımpıada komıteti taratqan aqparatta.
Shara barysynda Ulttyq Olımpıada komıtetiniń bas hatshysy Danııar Ábilǵazın sóz sóılep, ardagerlerdi quttyqtady.
«Qazaqstan sportynyń taǵlymdy tarıhy men tamasha dástúri bar. Biz sportshylarymyz halyqaralyq arenada qol jetkizgen barlyq jeńisterin zor maqtanyshpen jadymyzda saqtaımyz. Elimizdiń Ulttyq Olımpıada komıtetiniń qurylǵan kúnine 25 jyl tolýyn atap ótetin ardagerler osy dástúrler arqyly qazaqstandyqtardyń jas urpaǵyn munan da zor jetistikterge shabyttandyrady. Oǵan Qazaqstan Ulttyq Olımpıada komıtetiniń prezıdenti Tımýr Qulybaevtyń basshylyǵymen júzege asyrylyp kele jatqan olımpıadalyq sportty damytýdaǵy túbegeıli jańa ádister de óz septigin tıgizedi. Qazirdiń ózinde biz Qazaqstannyń sport ındýstrııasynyń barynsha tıimdi jumys isteýi úshin júıeli negiz qalap otyrmyz», - dedi ol.
Aıta keterligi, QR Ulttyq Olımpıada komıtetiniń qurylǵanyna 25 tolýyn atap ótý Astanada jalǵasyp, 17 naýryz kúni álemdik Olımpıada qozǵalysy men sportynyń joǵary mártebeli qonaqtary men kóshbasshylarynyń, Qazaqstannyń eńbek sińirgen sport qaıratkerleriniń qatysýmen saltanatty shara ótedi.
