Qazaqstan sportyn damytý qory «Sporttyń úzdikteri» atty joba boıynsha konkýrs jarııalamaq
ALMATY. Aqpannyń 11-i. QazAqparat / Ádilet Musahaev / - Qazaqstan sportyn damytý qory «Sporttyń úzdikteri» (Best in sports) atty joba boıynsha konkýrs jarııalamaq. Bul jaıynda «Qazaqstan sportynyń 2009 jylǵy qorytyndylary men aldaǵy jospary» taqyrybynda ótken baspasóz máslıhatynda aıtyldy,
dep habarlaıdy QazAqparat.
Qazaqstan sportyn damytý qory prezıdentiniń mindetin atqarýshy Vladımır Lysenko 2009 jyldyń sońyna qaraı «Úzdik sportshy» jáne «Úzdik bapker» atalymy boıynsha joba jasalǵanyn jáne 2010 jyldan bastap bul shara «Sporttyń úzdikteri» degen atpen keń aýqymdy joba bolyp júrgiziletindigin jetkizdi. «Bul joba aıasynda «jyl sportshysy», «jyl bapkeri», «sport kommentatory», «belsendi jankúıer» sııaqty 30 atalym boıynsha konkýrs jarııalaımyz. Elimizdegi sport salasynyń úzdikterin oqyrmandar ózderi anyqtap, www.frsk.kz portalyna daýys bere alady. Buny ulttyq júlde retinde joǵary deńgeıde ótkizemiz degen oıdamyn», deıdi V.Lysenko.
Jıyn barysynda QR Velosport federatsııasynyń vıtse-prezıdenti Nıkolaı Prokýrın qyzmetinen ketetinin jáne ózi jumys atqarǵan aralyqta Qazaqstan velosportshylary tabysty nátıjelerge qol jetkizgendigin aıtty. «Osy salada jumys isteý barysynda 19 velosport mektebi jáne álem boıynsha eń myqty «Astana» velokomandasy quryldy. Qazirgi kúni «Astana» komandasy quramynda qazaqstannyń 13 sportshysy óz ónerin kórsetýde. Sońǵy ýaqytta atalmysh komandamen Federatsııa basshylarynyń aýysqany belgili, sondyqtan bul baspasóz máslıhatyna sońǵy qatysýym», dedi óz sózinde N.Prokýrın.
