Qazaqstan sporttyń 6 túri boıynsha Islam oıyndaryna qatysady
ASTANA. QazAqparat - 12-22 mamyr aralyǵynda Ázerbaıjan astanasy Bakýde ótetin IV Islam yntymaqtastyq oıyndaryna Qazaqstan sporttyń alty túri boıynsha qatysady. Bul týraly «QazAqparat» HAA Ázerbaıjandaǵy menshikti tilshisi habarlaıdy.
35 otandyq sportshy boks, erkin kúres, áıelder kúresi, grek-rım kúresi, dzıýdo, taekvondo syndy sport túrleri boıynsha baq synaıdy. Qazaqstandyq delegatsııa 50 adamnan quralǵan, onyń quramynda 10 bapker, delegatsııa basshylary, shtab ókili, dárigerler men baspasóz hatshysy bar. Birinshi delegatsııa Bakýge 10 mamyrda barady, sportshylar negizgi saıystardan 2-3 kún buryn keledi. 12 mamyr kúni keshke oıyndardyń saltanatty ashylý sharasy ótedi.
Eske sala keteıik, Islam yntymaqtastyǵy oıyndaryn ótkizip turý jóninde sheshim Saýd Arabııasynda 2013 jyly ótken Islam yntymaqtastyǵy sport federatsııasy VIII Bas assambleıasynda qabyldanǵan. Islam uıymshyldyq oıyndary - Islam Yntymaqtastyq uıymyna múshe elderdiń qatysýymen tórt jylda bir ret ótetin sporttyq doda. Oıyndardyń baǵyty men baqylaýyna Islam uıymshyldyq oıyndary federatsııasy jaýapty. Uıymǵa múshe elderdiń musylman emes azamattary da jarysqa qatysa alady.
