Qazaqstan sportshylarynyń dopıng synamalary Germanııa zerthanalaryna joldandy - Qulybaev
ALMATY. QazAqparat - Qazaqstan Ulttyq Olımpıadııalyq komıteti Ońtústik Koreıada ótetin qysqy Olımpıada oıyndary aldynda sportshylarymyzdyń dopıng synamalaryn Germanııaǵa joldaǵan. Bul týraly búgin UOK prezıdenti Tımýr Qulybaev aıtty, dep habarlaıdy QazAqparat tilshisi.
Búgin Almatydaǵy AIBA Boks akademııasynda Ońtústik Koreıanyń Phenchhan qalasynda ótetin XXIII qysqy Olımpıada oıyndaryna Qazaqstan quramasyn saltanatty túrde shyǵaryp salý rásiminde sóz sólegen Ulttyq olımpıadalyq komıtet prezıdenti Tımýr Qulybaev dopıngke baılanysty másele týyndamas úshin Olımpıada aldynda sportshylarymyzdyń synamasyn Germanııanyń Drezden, Keln qalalaryndaǵy zerthanalaryna joldaǵanyn aıtty.
«Sportshylarymyzdyń dopıng synamalary Germanııanyń Drezden, Keln qalalaryna joldandy. Olımpıada aldyndaǵy daıyndyqtar aıaqtalyp keledi. Qazir 49 joldamamyz bar. Onyń sany áli de ósedi dep kútip otyrmyz. Qazaqstannyń resmı ókilderi osy aptada Koreıaǵa baryp, bizdiń sportshylarymyzdy qarsy alýǵa daıyndalady. 9 aqpanda Olımpıadanyń ashylý saltanatyna qatysamyz. Al 7 aqpan kúni Atletter qalashyǵynda Qazaqstannyń kók baıraǵyn kóteremiz. Sportshylarymyzǵa barlyq jaǵdaı jasaldy. Endi úzdik nátıje kórsetedi dep senemiz», - dedi Tımýr Qulybaev.
QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov QazAqparat tilshisiniń saýalyna jaýap bere kele mınıstrlik tarapynan dopıngke qarsy zań jobasy ázirlenip jatqanyn aıtty.
«Biz dopıngke qarsymyz. QR Mádenıet jáne aqparat mınıstrligi, UOK tarapynan da qatań jaza qoldaný sharalary qarastyrylyp jatyr. Naqtyraq aıtqanda, mınıstrlik tarapynan donıngke qarsy zań jobasy ázirlenip jatyr. Sportshylarymyzdan dopıng testteri alyndy, nátıjelerin kútip otyrmyz. Ázirge, barlyǵy jaqsy. Olımpıadaǵa tek taza sportshylarymyz barady», - dedi Elsııar Qanaǵatov.
Esterińizge sala keteıik, HHІІІ qysqy Olımpıada oıyndary 9-25 aqpan aralyǵynda Ońtústik Koreıanyń Phenchhan qalasynda ótedi. Tórt jyldyqtyń basty básekesine álemniń 90 memleketinen 2500-ge jýyq qysqy sporttyń úzdik sportshylary baq synaıdy.
