Qazaqstan sportshylary Rıo Olımpıadasynyń 110 joldamasyn utyp alýdy josparlaýda
ASTANA. QazAqparat - Qazaqstan sportshylarynyń aldyna 110 Olımpıada joldamasyn utyp alý maqsaty qoıylyp otyr. Bul týraly búgin 2016 jylǵy Rıo de Janeıroda ótetin XXXI Jazǵy Olımpıada Oıyndaryna daıyndyq máselesine arnalǵan jıynda Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.
"Bizdiń aldymyzǵa 27 sport túri boıynsha 110 Olımpıada joldamasyn utyp alý maqsaty qoıylyp otyr. London Olımpıadasynda 105 joldama bolǵan edi. Árıne, bizge qarqyndy damý kerek, bul ulttyq quramalarǵa qoıylǵan meje. Bıyl bizge álemdik deńgeıdegi lıtsenzııalyq jarystarda erkin kúres, boks, jeńil atletıka, júzý, qaıyqpen esý, kanoemen júzý syndy sport túrlerinen keminde 30 joldama alý kerek. Kelesi jyly álemniń kontınentaldi lıtsenzııalyq jarystaryna jáne 52 Álem kýbogi kezeńderinde sportshylar baqtaryn synaıdy. Ol jerde sportshylarymyz josparlanǵan joldamalardyń qalǵan bóligin alýlary tıis. Sońǵy lıtsenzııalardy 2016 jyldyń shilde aıyna deıin ala alamyz", - dedi E.Qanaǵatov.
Qazirgi ýaqytta 4 sport túri boıynsha 7 joldama bar. Aýyr atletıka quramasy 10 joldamany alýǵa bir qadam jaqyn. Endi ony álem chempıonatynda dáleldeýleri tıis. Jalpy, Rıo Olımpıadasyna 120-dan astam eldiń sportshylary keledi dep kútilýde. Onda 42 sport túri boıynsha 306 medal jıyntyǵy sarapqa salynady.
"Biz aýyr atletıka, bokstan erler jáne qyzdar quramasynan úmit kútip otyrmyz. Kúres túrlerinen, dzıýdodan da medal alý josparlary joq emes. Jeńil atletıkada jaqynda joldama jeńip alǵan Olga Rypakov bar. Bizdiń elde júzýden joǵary deńgeıdegi sportshylardyń bolmaǵany kóp boldy. Jaqynda Balandın degen sportshymyz shyqty. Búginde ol álemdik reıtıngte úshinshi orynda tur. Ol mindetti túrde Olımpıada medalin alady dep otyrǵanymyz joq, degenmen onyń shamasy jetedi", - dep atap ótti ol.
