Qazaqstan sportshylary V Azııa para oıyndaryna attandy
ASTANA. KAZINFORM — Astanada Qazaqstan ulttyq quramasyn V Azııa Para oıyndaryna shyǵaryp salý rásimi ótti. Baıraqty báseke 18–24 qazan aralyǵynda Japonııanyń Aıchı prefektýrasy men Nagoıa qalasynda ótedi. Qurlyqtyq dodaǵa elimizden 150 sportshy qatysady. Olar sporttyń 12 túrinen baq synaıdy.
Sanaýly kúnnen soń baǵy men baby synǵa túsetin sportshylardyń boıynan jiger men jeńiske degen senim baıqalady. Ásirese, tý ustaýshylyrdyń tolqynysy aıryqsha kózge túsedi. Óıtkeni artylǵan jaýapkershilik júgi eselendi.
Bul joly Azııa oıyndarynyń ashylý rásiminde kók baıraǵymyzdy Parıj Paralımpıadasynyń qola júldegeri, para jeńil atletıkadan álem chempıony Dastan Muqashbekov pen para dzıýdodan álem chempıony Mereke Aıala ustap shyǵatyn boldy.
— Qazaqstannyń týyn alyp shyǵý — men úshin úlken mártebe. Japonııada kók týymyzdy bıikke kóteremiz dep senemin. Daıyndyǵymyz joǵary deńgeıde. Azııanyń ishinde birinshi oryn alamyn dep oılaımyn, — dedi para dzıýdodan álem chempıony Aıala Mereke.
Kúnshyǵys elinde ótetin dodaǵa 45 elden 4 myńǵa jýyq sportshy qatysady. Olar sporttyń 18 túrinen 502 medal jıyntyǵyn sarapqa salady. Qazaqstan atynan 150 sportshy 12 sport túrinen baq synaıdy. Onyń bireýi komandalyq, 11-i jekeleı sport túri.
Bıylǵy oıyndarda el quramasy arbadaǵy tennısten alǵash ret baq synaıdy. Ári, para jeńil atletıkadan zııatkerlik damý erekshelikteri bar sportshylar da qurlyqtyq saıysqa birinshi ret qatysady.
— Sońǵy tórt jylda sportshylarymyz iri halyqaralyq jarystarda jaqsy nátıje kórsetip keledi. Jaqynda paravoleıboldan ulttyq quramamyz álem chempıonatynda qola medal jeńip aldy. Para júzý men para dzıýdodan da júldelerimiz bar. Azııa oıyndarynda da birneshe sport túrinen joǵary nátıje kórsetemiz dep senemiz, - dedi QR Týrızm jáne sport mınıstri Erbol Myrzabosynov.
V Azııa para oıyndarynyń alǵashqy jarystary 16 qazanda para ústel tennısinen bastalady.
Aıta keteıik, elimiz Azııa para oıyndaryna 2010 jyldan beri qatysyp keledi. Osy ýaqyt aralyǵynda otandastarymyz 20 altyn, 35 kúmis jáne 50 qola medal jeńip aldy. Eń úzdik nátıje 2023 jyly Qytaıdyń Hanchjoý qalasynda ótken básekede tirkeldi. Ol kezde 131 sportshymyz 41 medal ıelendi. Qorjynǵa túsken altyn sany 8, kúmis 12, qola 21.
Eske salaıyq, jaqynda 2032 jylǵy Olımpıada jáne Paralımpıada oıyndarynyń resmı emblemasy tanystyryldy.
