Qazaqstan sportshylary ótken aptada qandaı jetistikterge qol jetkizdi
ASTANA. KAZINFORM – Ótken apta qazaq sportshylary úshin jetistikterge toly boldy. Búgin nazarlaryńyzǵa sol sportshylarymyzdyń qandaı kórsetkishterge qol jetkizgenin qysqasha baıandap ótsek.
Koreıadaǵy jasóspirimder Olımpıadasy
Ońtústik Koreıanyń Kanvon qalasynda ótip jatqan IV qysqy jasóspirimder Olımpıadasy 19 qańtar kúni alaýy tutandy. Atalǵan dodanyń alǵashqy kúni Qazaqstan qorjynyna tuńǵysh altyn medal tústi.
Ony shańǵymen tuǵyrdan sekirýden Qazaqstan komandasynyń múshesi Ilıa Mızernyh jeńip alsa, ekinshi jarys kúni short-trekten 1 000 metr qashyqtyqta synǵa túsken sportshylardyń arasynan Polına Omelchýk qola medalǵa ıe boldy.
Stend atýdan Azııa chempıonaty
Ótken aptada Kýveıttegi stend atýdan ótken Azııa chempıonatynda jerlesterimiz 7 medal jeńip aldy.
Trap baǵdarlamasynyń juptyq synynda Álisher Aısalbaev pen Marııa Dmıtrenko top jarsa, dál osy baǵdarlamanyń jastar básekesinde el quramasy úzdik shyqty. Sonymen qatar skıt baǵdarlamasynda Qazaqstan jastar quramasy Azııa chempıony atandy.
Al jekeleı synda Ilıa Penkov, Marııa Dmıtrıenko, trap jáne skıt baǵdarlamasynyń komandalyq saıysynda elimizdiń áıelder quramasy qola júldege qol jetkizdi.
Konkımen júgirýden 4 qurlyq chempıonaty
AQSh-tyń ıÝta shtatynda (Solt-Leık-Sıtı) ótken konkımen júgirýden 4 qurlyq chempıonatynda komandalyq sprıntte elimizdiń erler quramasy kúmis júldeger atandy.
Altaı Járdembekuly, Evgenıı Koshkın, Nıkıta Vajenın men Artýr Galıev (rezervte) kvarteti tek Kanada quramasynan qalyp qoıdy. Úzdik úshtikti Ońtústik Koreıa konkıshileri túıindedi.
Bokstan Ishtvan Bochkaı atyndaǵy týrnır
Ótken aptada Majarstannyń Debretsen qalasynda bokstan Ishtvan Bochkaı atyndaǵy memorıal aıaqtaldy. Atalǵan jekpe-jek dodasynda qazaqstandyq boksshylar 5 altyn medal jeńip aldy.
Jerlesterimizden Ashat Júsipov (48 kg), Asyljan Serikbaı (57 kg), Beıbarys Jeksen (60 kg), Ertýǵan Zeınýllınov (63,5 kg) jáne Erasyl Jaqpekov (80 kg) chempıon atansa, Danııal Sábıt (51 kg), Kenje Muratuly (54 kg), Sabyrjan Aqqalyqov (71 kg) jáne Temirlan Muqataev (86 k) kúmis júldege ıe boldy.
Ústel tennısinen WTT Feeder Corpus Christi 2024 halyqaralyq týrnıri
Qazaqstandyq Kırıll Gerasımenko AQSh-ta ústel tennısinen ótken WTT Feeder Corpus Christi 2024 halyqaralyq týrnıriniń jeńimpazy boldy.
Ulttyq qurama úzdigi jarys barysynda tórt birdeı qarsylasynan basym tústi. Atap aıtqanda, Gerasımenko amerıkalyq Kaı Chjandy 3:1, úndistandyq Harmıt Desaıdy 3:1, germanııalyq Shteffen Mengeldi 3:1, portýgalııalyq Joao Monteırýdi 3:2 esebimen jeńip, jeńis tuǵyryna kóterildi.
Halyqaralyq Thailand Cup týrnıri
Taılandta ótken maýntınbaıktan halyqaralyq Thailand Cup týrnırinde el quramasynyń ókili Alına Sarkýlova úzdik nátıje kórsetip, jarys júldegerleriniń qatarynan kórindi. Jarys máresine úshinshi bolyp jetken otandasymyz týrnırdiń qola júldegeri atandy.
Kúres túrlerinen ótken Henri Deglane (Anrı Deglan) gran-prı
Ótken aptada Frantsııanyń Nıtstsa qalasynda ótken kúres túrlerinen Henri Deglane (Anrı Deglan) gran-prı jarysynda elimizdiń úsh balýany júldegerler qatarynan kórindi.
Atap aıtqanda, Ábdimanap Baıkenjeev (92 kg) fınalda jeńilip, ekinshi orynǵa taban tirese, Rıfat Saıbotalov (70 kg) pen Erhan Beksultanov (79 keli) qola júldeni qanjyǵaǵa baılady.
