Qazaqstan sportshylary ártistik júzýden úzdik úshtikke endi
ASTANA. KAZINFORM - Sıan (Qytaı) qalasynda ártistik júzýden World Aquatics uıymynyń qoldaýymen ótken álem kýbogynyń fınaldyq kezeńi óz máresine jetti. Maýsymnyń qorytyndy saıysynda álemniń úzdik sportshylarymen qatar Qazaqstan quramasynyń ókilderi de óner kórsetti, - dep jazdy Ulttyq Olımpıadalyq komıtet.
Óz jerinde ótken kezeńde Qytaı quramasy senimdi óner kórsetip, altyn medaldardyń basym bóligin jeńip aldy. Bul týrnırde sportshylardyń alǵan júldeleri erekshe mánge ıe boldy. Sebebi olar álem kýbogynyń jalpy esebindegi oryndy anyqtaýda sheshýshi ról atqardy.
Jalpy esepke maýsym barysynda ótken barlyq kezeńdegi nátıjeler engizildi. Bıylǵy jarys kúntizbesinde tórt álem kýbogynyń kezeńi ótti. Maýsym boıy Qazaqstan quramasy joǵary nátıje kórsetti. Bul otandastarymyzǵa kýbokty kóshbasshylar qatarynda aıaqtaýǵa múmkindik berdi.
Nátıjesinde Qazaqstan quramasy toptyq baǵdarlamalarda (barlyq dıstsıplınadaǵy upaılar sany boıynsha) qola júldege ıe boldy. Júldegerler qatarynda Nargıza Bolatova, Vıktor Drýzın, Áıgerim Qurmanǵalıeva, Ksenııa Makarova, Arına Mıasnıkova, Anna Pavletsova, Jaklın ıAkımova, Janııa Jıenǵazy, ıAsmın Týıakova jáne Valerııa Stolbýnova bar.
Qazaqstan quramasynan óner kórsetken áıelder juby ekinshi oryndy ıelendi. Tehnıkalyq baǵdarlamada el namysyn ıAsmın Týıakova men Arına Pýshkına qorǵady. Erkin baǵdarlamada Týıakovaǵa upaı jınaýda Daıana Jamanchalova serik boldy.
Sondaı-aq, aralas jubymyz da álem kýbogyn sátti aıaqtady. Jalpy esepte Vıktorııa Stolbýnova men Artýr Maıdanov úshinshi oryndy saqtap qaldy. Bul bizdiń sportshylardyń joǵary deńgeıde óner kórsetýge daıyn ekenin kórsetti. Erler arasyndaǵy jekeleı baǵdarlamada Vıktor Drýzın tórtinshi orynmen shektelip, júldege bir qadam jetpeı qaldy.
Aıta ketý kerek, bıylǵy maýsymda bizdiń sportshylar birneshe ret júldeli oryndarǵa ıe boldy. Aqpanda Parıjde (Frantsııa) ótken kezeńde Vıktor Drýzın altyn medal jeńip alsa, Edýard Kım el qorjynyna kúmis medal saldy. Al Hýrgadada (Mysyr) ótken kezeńde Edýard úshinshi nátıjemen jarysty aıaqtady.
Sondaı-aq, ótken jyly Vıktor Drýzın World Aquatics nusqasy boıynsha «Jyl sportshysy» ataǵyna usynylǵan bolatyn.
Qazaqstanda ártistik júzý birtindep damyp keledi. Bul – sportshylarymyzdyń aralyq nátıjelerinen aıqyn kórinip otyr. Halyqaralyq jarystardaǵy joǵary nátıjeler qazaqstandyq sportshylardyń álemdik deńgeıdegi myqty qarsylastarmen taıtalasa alatynyn jáne keıbir baǵyttarda úzdikterdiń qataryna jaqyndaı túskenin kórsetedi.
Aıta keteıik, fýtboldan áıelder arasyndaǵy Qazaqstan chempıonatynda «Aqtóbe» óziniń rekordyn jańartty.