Qazaqstan sportyndaǵy eń tanymal ınternatsıonal otbasylar
ASTANA. KAZINFORM – 1 mamyr – Qazaqstan halqynyń birligi kúni. Osy merekege oraı Kazinform tilshisi otandyq sport álemindegi túrli ult ókilderinen quralǵan tanymal áýletterge sholý jasaıdy.
El ıgiliginiń negizi – ultaralyq tatýlyq. Búgingi mereke Qazaqstandy meken etken barsha etnos arasyndaǵy dostyq pen berekeniń sımvolyna aınalǵan. Elimizde halyqtar dostyǵyn aıshyqtaıtyn etnosaralyq nekelerdiń bolýy qalypty qubylys, sońǵy jyldary tirkelgen nekelerdiń 18–19 %-y osyndaı odaqtardyń úlesinde.
Bul – elimizde qurylǵan árbir besinshi shańyraqtyń ınternatsıonaldy ekendiginiń kórinisi. Olardyń ishinde jankúıerge tanymal sportshylardyń nemese erli-zaıyptylardyń biri úlken sportqa qatysy bar jandardyń juby az emes. Nazarlaryńyzǵa sport salasynda júrip, bir arnada toǵysqan tanymal tulǵalardy usynamyz.
Denıs pen Madına Nıkısha
Denıs pen Madınanyń shańyraǵy – elimizdegi eýrazııalyq úlginiń jarqyn kórinisi. 2022 jyldyń jeltoqsanynda Almatyda ótken short-trekten Álem kýbogynda jeńiske jetkennen keıin, Denıs súıiktisi Mádınaǵa usynysty tikeleı «Halyq Arena» muz aıdynynda jasady. Konkımen muz ústinde tizerlep, júrekjardy usynysyn bildirgen sát kóptiń esinde qaldy.
Jup 2024 jyldyń jazynda, Denıs mansabynda alǵash ret álem vıtse-chempıony atanǵannan keıin nekelerin resmı túrde qıdy. Sportshynyń aıtýynsha, otbasylyq ómir jattyǵýdan alańdatpaıdy, kerisinshe, motıvatsııa berip, qoldaıdy. Búginde erli-zaıypty kishkentaı qyz tárbıelep otyr. Denıs qyzynyń esimi jazylǵan bilezikti jarystar kezinde boıtumar retinde taǵyp júredi.
Narıman men Aıda Qurbanovtar
Narıman men Aıdany tabystyrǵan – sport. Ekeýi de gımnast. Aıda Baýyrjanova (turmysqa shyqqan soń Qurbanova) – sporttyq gımnastıkadan Qazaqstan áıelder quramasynyń kapıtany ári kóshbasshysy, Islam oıyndarynyń chempıony jáne Azııa birinshiliginiń júldegeri.
Bul juptyń hıkaıasy 2018 jyly bastalyp, 6 jyldan soń, ıaǵnı Narıman Olımpıadada top jarǵannan keıin, 2024 jyldyń qyrkúıeginde zańdy nekege ulasty. 2026 jyldyń basynda Narıman men Aıda áleýmettik jelide súıinshi jańalyqtaryn bólisip, alǵashqy sábılerin kútip júrgenderin resmı túrde jarııalady.
Rýslan men ıÝlııa Qurbanovtar
Qazaqstannyń eńbek sińirgen sport sheberi, tanymal semserlesýshi Rýslan Qurbanov pen onyń jary ıÝlııanyń otasqanyna kóp bola qoımasa da, bul jup týraly qyzyqty derekter jetkilikti.
Olar 2021 jyly Tokıo Olımpıadasynan keıin áleýmettik jeli arqyly tanysqan. Rýslan Almatyda ıÝlııany kofe ishýge shaqyrady. Bolashaq jarynyń Olımpıadadan keıingi sportshynyń psıhologııalyq kúıine shyn nıetpen alańdaýshylyq bildirgeni Rýslandy tánti etken. Tanysqandaryna eki jyl bolǵan soń, ol úıinde bolashaq jaryna usynys jasap, 2023 jyldyń qyrkúıeginde dúbirletip toı ótkizgen.
ıÝlııa Qurbanova – menedjment magıstri dárejesi bar ekonomıst bolǵanymen, sporttan alys emes (kezinde sınhrondy júzý, voleıbol jáne bımen aınalysqan). Qazirgi tańda kınoındýstrııada eńbek etedi, sonymen qatar Qazaqstan semserlesý federatsııasynyń PR qyzmetin basqarady.
ıÝlııa Rýslannyń birinshi nekesinen týǵan uly Tamırmen tez til tabysyp, jaqyn dos bolyp ketti. Sportshy bolashaq jaryna usynys jasaǵan sátte de qasynda kishkentaı Tamır bolǵan. ıÝlııa as úı sharýasyna da beıim. Uzaq jıyndardan oralǵan jaryna borş pen kotlet ázirlegendi unatady. Al Rýslan qalyptasqan dástúr boıynsha súıiktisine tańǵy as daıyndaýdy óz moınyna alǵan.
Adelına men Vıtalıı Zems
Adelına Zems (turmysqa shyqqanǵa deıin – Ahmetova) pen onyń joldasy – jeńil atletıkadan tanymal sporttyq jup. Ortaq múdde men bir sport túrine degen mahabbat olardyń sezimin ushtastyrǵan. Adelına óz mansabynda jabyq ǵımarattaǵy Azııa birinshiliginiń úsh dúrkin chempıony (4h400 m estafeta) atanyp, jazǵy Azııa oıyndarynda júldegerler qatarynan kórindi. Al Vıtalıı Zems – qysqa qashyqtyqqa júgirýdiń (sprınt) sheberi.
Erli-zaıypty birge jattyǵady, ulttyq qurama sapyndaǵy oqý-jattyǵý jıyndaryna da jıi birge barady. Adelına áleýmettik jelidegi paraqshasynda sporttaǵy kez kelgen belester men qıyndyqtarda jary, shańyraǵy jáne jattyqtyrýshysy eń basty tiregi ekenin únemi aıtyp júredi. Bul jup kásibı jelaıaqtardyń tań atqannan kesh batqanǵa deıingi aýyr jattyǵý sátterin, stadıon men sport zalyndaǵy kózden tasa ómirin oqyrmandaryna ázilmen jetkize biledi.
Nurqoja Qaıpanov pen Marııa Sedneva
Olar erkin kúres álemindegi shoqtyǵy bıik juptardyń biri. Nurqoja – álem jáne Azııa chempıony atanǵan belgili balýan. Jary Marııa da áıelder kúresinen túrli halyqaralyq týrnırlerde top jaryp júr.
Nurqoja Qaıpanov pen Marııa Sednevanyń Rahmetýlla esimdi uldary bar, ol bıyl 5 jasqa tolady. Marııa ana atansa da (turmysqa shyqqan soń Sedneva-Qaıpanova qos tegin aldy), boz kilemge sátti oralyp, iri dodalarda júlde alýdy jalǵastyrdy.
Ashat Jitkeev pen Elena Pavlova
2008 jylǵy Beıjiń Olımpıadasynyń kúmis júldegeri Ashat Jitkeev pen sol Olımpıadanyń qatysýshysy, voleıbolshy Elena Pavlova – qazaqstandyq sporttaǵy eń úlgili juptardyń biri.
Ataqty sportshylardyń otbasynda Tomırıs, Rasýl, ıAsmın jáne Taımas esimdi tórt bala tárbıelenip otyr. Elena bala tárbıesi men úlken otbasynyń qamy úshin voleıboldaǵy kásibı mansabyn aıaqtaǵan bolatyn.
Medet Anarqulov pen Sana Anarqulova (Jarlaǵasova)
Medet – kásibı voleıbolshy. Sana da – tanymal voleıbolshy, uzaq ýaqyt boıy Qazaqstan quramasynyń kapıtany boldy. Onyń atasy – ýkraın, al otbasynda birneshe ulttyń qany bar, sondyqtan olardyń odaǵyn jıi ultaralyq otbasynyń jarqyn úlgisi retinde ataıdy.
Medet pen Sana Anarqulovtardyń Mılana esimdi qyzy bar. Ol 2013 jyly dúnıege kelgen. Ata-anasynyń suhbattarynda aıtýynsha, qyz bala anasynyń qaısar minezi men ákesiniń ádemi kózderin mura etken. Bir qyzyǵy, sábıdiń dúnıege kelýi Sananyń sporttyq mansabyn jalǵastyrýyna kedergi bolǵan joq, ol áli de qazaqstandyq voleıboldyń kóshbasshysy bolyp qalyp otyr.
Mundaı juptardyń kópshiligin ulty emes, ortaq múddeleri, sportqa degen adaldyǵy biriktiredi. Otbasynda erli-zaıyptynyń biri úlken sportpen aınalyssa, ekinshisi onyń jumysyn bólisip, barlyq jaǵynan qoldaý kórsetedi.
Aıta keteıik, elordada etnostar festıvali uıymdastyrylǵan bolatyn.