Qazaqstan sportynda basym baǵyttar belgilendi – Týrızm jáne sport mınıstrligi

ASTANA. KAZINFORM – Qazaqstanda sporttyń 46 basym túri anyqtalyp, «Dene shynyqtyrý jáne sport týraly» jańa Zań aıasynda 60 normatıvtik-quqyqtyq aktini ázirleý jumystary júrgizilip jatyr. Bul týraly Ortalyq kommýnıkatsııalar qyzmetinde ótken brıfıngide Týrızm jáne sport mınıstriniń orynbasary Serik Jarasbaev málimdedi.

Vıtse-mınıstrdiń aıtýynsha, Zań aıasynda qabyldanǵan túzetýlerdi iske asyrý maqsatynda qoldanystaǵy normatıvtik-quqyqtyq aktilerge (NQA) ózgerister engizilip, jańa zańǵa táýeldi aktiler ázirlenip jatyr.

– Zańǵa sáıkes qabyldanýǵa tıis 60 normatıvtik-quqyqtyq aktiniń tizbesi bekitildi. Onyń ishinde 53-i – Týrızm jáne sport mınıstrligine tıesili. Búgingi tańda 42 normatıvtik-quqyqtyq akti qabyldandy. Onyń 6-aýy jańadan ázirlense, 36-sy – qoldanystaǵy qujattar. Sonymen qatar Qarjy jáne Ádilet mınıstrlikterimen birlesip 11 NQA jobasy boıynsha kelisý jumystary júrgizilip jatyr, - dedi Serik Jarasbaev.

Buǵan qosa, vıtse-mınıstr júzege asyrylyp jatqan qujattarǵa da toqtaldy. Sonyń ishinde basty jańalyqtardyń biri retinde elimizde sporttyń 46 basym túriniń aıqyndalýyn erekshe atap ótti. Bul tizimge Olımpıada, Paralımpıada, Sýrdlımpıada, Azııa jáne Paraazııa oıyndarynyń baǵdarlamasyna engen sport túrleri, sondaı-aq olımpıadalyq emes, biraq halyqaralyq deńgeıde moıyndalǵan jáne ulttyq sport túrleri engizilgen. 

– Bul sheshim elimizdiń sport salasyndaǵy resýrstaryn áleýeti joǵary baǵyttarǵa jumyldyrýǵa múmkindik beredi. Nátıjesinde, Qazaqstannyń joǵary jetistikti sporttaǵy kórsetkishteri arta túsedi, - dedi vıtse-mınıstr. 

Buǵan deıin Týrızm jáne sport mınıstrligi sport salasyn qarjylandyrý tetikterin jetildirý jáne bıýdjet qarajatyn tıimdi basqarý baǵytynda júıeli jumystar júrgizilip jatqanyn jazǵanbyz.