«Qazaqstan» Sport saraıynyń basseıni kúrdeli jóndeýge jabylady
ASTANA. QazAqparat - «Qazaqstan» Sport saraıynyń basseıni kúrdeli jóndeýge jabylady. Bul týraly «Astana» ÁKK» UK» AQ baspasóz qyzmeti habarlaıdy.
Baspasóz málimetterine qaraǵanda, «Astana» ÁKK» UK» AQ «Qazaqstan» Sport saraıyna senimdi basqarý júrgizedi jáne turaqty túrde qala turǵyndary men qonaqtaryna basseındi paıdalaný jaǵdaılaryn jaqsartý aıasynda turaqty qyzmet etip keledi. Sondaı aq qajetti qaýipsizdik deńgeıin qamtamasyz etý sharalary jiti baqylaýǵa alynǵan. Osy jumystar sheńberinde nysannyń tehnıkalyq jaǵdaıyn anyqtaý maqsatynda, «Qazaqstan» Sport saraıynyń tirek konstrýktsııalary men ǵımarat túıinderine keshendi tekserý júrgizilgen bolatyn.
Tehnıkalyq zertteýlerdiń nátıjesinde «Qazaqstan» Sport saraıynyń basseın qurylymy apatty jaǵdaıda ekeni týraly qorytyndy berildi. Zertteý nátıjeleri basseın qabyrǵalarynyń salmaq kóterý qabiletiniń jáne paıdalaný jaramdylyǵynyń tómen ekendigin kórsetti.
«Qazaqstan» Sport saraıy 2001 jyly paıdalanýǵa berildi jáne osy ýaqyttan beri ǵımaratta kúrdeli jóndeý jumystary júrgizilmegen.
«Osy aıtylǵan máselelerdi eskere otyryp, «Qazaqstan» Sport saraıyna kelýshiler men qyzmetkerlerdiń qaýipsizdigin qamtamasyz etý maqsatynda «Astana» ÁKK» UK» AQ basseın aımaǵynyń qyzmetin toqtatý týraly sheshim qabyldady. Atalmysh shara bıylǵy jyldyń 27 tamyzynda kúshine enedi jáne basseıin aımaǵyndaǵy jóndeý jáne qaıta qalpyna keltirý jumystary aıaqtalǵanǵa deıin kúshinde bolady»,-delingen habarlamada.
Qoldanystaǵy abonentteri bar jáne basqa da basseın kelýshileri úshin «Astana» ÁKK» UK» AQ basseıindegi jattyǵý sabaqtaryn «Barys Arena» kópfýnktsıonaldy muz saraıynyń basseınde jalǵastyra alady.
«Bul rette abonent talaptary men kelisim sharttary saqtalatynyn atap ótemiz. Sondaı aq «Qazaqstan» Sport saraıynyń basseın abonentteri merzimsiz shartqa aýystyrylyp, kelýshilerge jóndeý jumystary aıaqtalǵannan keıin jattyǵýlaryn jalǵastyrýǵa múmkindik beredi. Kórsetilgen qolaısyzdyqtar úshin keshirim suraımyz jáne sportsúıer qaýym tarapynan túsinistik bolady dep úmittenemiz. Bizdiń basty maqsatymyz adam densaýlyǵy men ómiriniń qaýipsizidigin qorǵaý»,-delingen taratylǵan aqparatta.
