Qazaqstan sport odaǵy Qazaqstanda memlekettik sport telearnasyn ashýdy usyndy
ASTANA. 20 qańtar. QazAqparat /Jasulan Amanbaıuly/ - Qazaqstan sport odaǵy Qazaqstanda memlekettik sport telearnasyn ashý qajet dep sanaıdy.
Búgin Astanada ótken «Buqaralyq sport. Damý jaǵdaıy men bolashaǵy» atty respýblıkalyq dóńgelek ústel jıynynda «Qazaqstan sport odaǵy» ZTB-niń tóraǵasy Erlan Janǵulov Qazaqstanda «Sporttyń jol kartasy» baǵdarlamasyn daıyndaý barysynda osy máseleni engizýdi usyndy.
E. Janǵulovtyń aıtýynsha, memlekettiń júrgizip jatqan sharalaryna qaramastan, halyq arasynda buqaralyq sport jáne dene shynyqtyrýdy nasıhattaý tómen deńgeıde qalyp otyr.
«Eldiń barlyq aımaqtarynda, halyqtyń ár túrli áleýmettik toptar arasynda júrgizilgen áleýmettik zertteýlerdiń nátıjeleri boıynsha, qazaqstandyqtardyń 85 paıyzy dene shynyqtyrý jáne sportpen shuǵyldanýǵa nıet bildirmeıtindikterin aıtqan. Buqaralyq sportqa tartý úshin bizge úgit-nasıhat jumysyn belsendirý qajet»,-dedi E. Janǵulov.
Osy oraıda Qazaqstan sport odaǵy eldiń barlyq azamattaryna qoljetimdi memlekettik sport telearnasyn qurý múmkindigin qaraýdy usynyp otyr.
«Qazaqstandyqtardyń 64 paıyzǵa jýyǵy teledıdardy jıi kóredi. Sondyqtan nasıhat jumysyn jasaý barysynda basty nazardy teledıdarǵa aýdarý qajet dep oılaımyz»,-dep atap kórsetti ol.
Ótkizilgen áleýmettik zertteýde anyqtalǵanyndaı, halyqtyń 64 paıyzy teledıdardy únemi qaraıtyndyǵyna qaramastan, olardyń 5/1-i bizdiń elimizdiń Olımpıada chempıondaryn bilmeıtin kórinedi. «Bul - Qazaqstanda televızııalyq sporttyq baǵdarlamalardyń az ekendigin bildiredi»,-dedi E. Janǵulov.
Eske sala keteıik, búgingi dóńgelek ústelde «Qazaqstan sport odaǵy» ZTB jáne «Nur Otan» partııasy elimizde «Sporttyń jol kartasy» baǵdarlamasy jobasyn engizý jaıyn qarastyrǵan bolatyn.
