Qazaqstan sózden iske kóshti – reseılikter turmystyq zorlyqqa jazany kúsheıtý týraly
ASTANA. KAZINFORM – Keshe Senattyń jalpy otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańy men ilespe qujat eki oqylymda qaralyp, maquldanǵan edi. Dál osy zań el ishinde ǵana emes kórshiles Reseı qoǵamynda da qyzý talqyǵa túsip jatyr. Osyǵan oraı, Kazinform reseılikterdiń eń qyzyqty pikirlerin oqyrman nazaryna usynady.
Jýrnalıst ári telejúrgizýshi Ksenııa Sobchak «Krovavaıa barynıa» Telegram-arnasynda Saltanatty qoldaý fleshmobyna demeý bildiretindigin málimdedi.
«Menińshe, taıaý ýaqytta bul el burynǵy TMD-daǵy eń progressıvti elge aınalady. Áıelder «eger siz meni sharap quıylǵan bokalmen kórseńiz, demek bul meni óltirýge bolady degendi bildirmeıdi» degen jazbamen sharap ustap túsken sýretterin jappaı jarııalady». Hanymdar, men sizdermen birgemin jáne jan-jaqty qoldaımyn», - dep jazdy Ksenııa Sobchak.
Ony tanymal júrgizýshi jáne bıznesvýmen Ksenııa Borodına da qoldap otyr. Ol otbasylyq zorlyq-zombylyqty ózi de bastan keshirgenin jasyrǵan joq.
«Men keı otbasylarda urys-keris bolyp jatqanyn jıi kórdim. Dostarym, qurbylarym da aıtatyn. Ókinishke qaraı, meniń de otbasymda ondaı jaıttar bolyp turdy. Bizge ol qalypty dúnıedeı kórinetin. Óıtkeni, qarym-qatynasymyzǵa enip ketti. Biraq, bul – durys emes», - deıdi Ksenııa Borodına oqyrmandaryna.
Reseılik model Anastasııa Reshetova barlyq psıhopattyń, abıýzerdiń minez-qulqy birdeı ekendigin alǵa tartady.
«Meniń de basymnan osyǵan uqsas jaıt ótken edi. Mundaı psıhologııalyq tutqynnan ózdigińnen shyǵý múmkin emestigin aıta alamyn. Árbir agressııalyq áreketinen keıin sizdi syılyqtyń astyna qaldyrady nemese jyly sóılep, kóńilińdi tynyshtandyrady. Ádette, oǵan ózińiz kináli ekendińizge ılandyrady», - dep jazdy ol áleýmettik jelidegi paraqshasynda.
Reseılik advokat Kaloı Ahılgov ashyq sot protsesi jalpy sot júıesine senimdi barynsha arttyratyndyǵyn jáne qarapaıym azamattar úshin aǵartýshylyq sıpatqa ıe ekendigin aıtady.
«Keıingi jyldary Qazaqstannyń sot júıesinde ne bolyp jatqanyn jiti qadaǵalap otyramyn. Olardyń problemalardy anyqtap, ony sottarmen, prokýrorlarmen jáne advokattarmen birge sheshetindigi kórinip-aq tur. Máselen, Qazaqstanda ıývenaldy sot jumys isteıdi. Onda otbasylyq ister qaralady. Jeke ınstıtýt – ákimshilik ádilet kásipkerlerdiń qadaǵalaýshy organdarmen daýlaryn qarastyrady jáne de bul – reformalardyń bir bóligi ǵana. Bári de keremet emestigine senimdimin. Biraq, ilgeri basýdy baıqamaý múmkin emes. Bul jalpy sot júıesine senimdi barynsha arttyra túsedi dep sanaımyn. Protsestiń ózi jaı ǵana qyzyqty emes, sonymen birge qarapaıym azamattar úshin aǵartýshylyq sıpatqa da ıe. «Sot keledi!» dep qalyptasqan túsinik emes, qalaı bolýy tıis bolsa, dál solaı kórsetilip jatqan shynaıy protsess. Sot zalyndaǵy protsesti baqylap otyrǵanymda qorǵaýshylardyń ózinde qorǵaý strategııasyna qatysty biryńǵaı oı-pikir joq sııaqty kórindi. Ol túsinikti de... Degenmen, men de qatelesýim múmkin. Al úkim qandaı bolatyndyǵyn menińshe barlyǵymyz da óte jaqyn arada bilemiz», - dep túıindeıdi sózin advokat.
Stendap-komık Arıana Lolaeva vıdeo jazyp, onda áıelderdiń qaýipsizdigi men sot ádildigi úshin jantúrshigerlik oqıǵany Qazaqstannan da tysqary jarııalaýdyń mańyzdylyǵyna toqtalady.
«Bul – barlyq áıeldiń isi. Bul – qazirgi álemde áıelderdiń ıyǵyna artylar aýyrtpalyqqa beı-jaı qaramaıtyndardyń barlyq jannyń isi», - deıdi ol.
Reseılik prodıýser Maksım Fadeev te pikir bildirýden tysqary qalǵan joq.
«Otbasyndaǵy turmystyq zorlyq-zombylyqtyń qanshalyq jıi ólimmen aıaqtalatyndyǵy jaıly oılandym. Bul elimizde áli kúnge deıin qylmys dep tanylmaıdy. Ókinishke qaraı, erkek te, áıel de, sońy ekeýiniń biriniń ólimine alyp keletin aýyr qylmys jasaıdy. Eń aldymen, erlerdiń ezgisine ushyraıtyn áıelderge keńes berer (eger keńes bere alsam) edim: eger de sizdi erkek tym bolǵanda bir ret ursa, shapalaqpen tartyp jiberip nemese judyryq jumsasa, onda bul munyń únemi qaıtalanatyndyǵynyń dabyly ekenin bilińiz», - dedi Maksım Fadeev.
Telejúrgizýshi Vıktorııa Lopyreva áıelderdi otbasyndaǵy turmystyq-zorlyq zombylyqty jasyrmaýǵa shaqyrdy.
«Zárem ushty. Qansha áıeldiń juby tarapynan jasalatyn fızıkalyq jáne emotsıonaldy zorlyq-zombylyqqa tózip júrgenin oılaýdyń ózi qorqynyshty. Eń qıyny, bul jaıynda aıtýdan jáne kómek suraýdan qorqady. Statıstıkalyq derekterge qaraǵanda, áıelderdiń jartysynan kóbi juptarynan áıteýir bir dórekilik kórgenin aıtpaı jasyrady. Óıtkeni, bul – qorqynyshty, uıat. Óıtkeni, barlyq ýaqytta da pikir rezonans týdyrady. Munyń ústine, adamdar «ózi kináli» dep jatady. Mundaı sózderden ózimdi qoıarǵa jer tappaı qalamyn. Qyzdar, saqtanyńdar. Senderdi renjitýge eshkimniń de quqy joq», - dep jazdy bloger.
