Qazaqstan sóz bostandyǵy reıtınginde nege 160-shy orynda - Dáýren Abaevtyń jaýaby
«Biz bul baǵytta áli de jumys istep, úırený kerektigin jasyryp otyrǵan joqpyz. Bul - qalypty evolıýtsııalyq protsess. Qazaqstan - demokratııany qalyptastyryp kele jatqan memleket. Táýelsizdiktiń úsh on jyldyǵynda biz josparly túrde demokratııalyq ınstıtýttardyń irgesin qalap, sonymen qatar radıkaldyq stsenarıılerden boıymyzdy aýlaq salǵymyz keledi. Reıtıng týraly aıtar bolsam, sóz bostandyǵy týraly reıtıng - shynaıy (obektıvti) emes dep esepteımin. Onyń ádistemesinde dolbar kóp», - dedi Dáýren Abaev Habar arnasyndaǵy «Ashyq dıalog» baǵdarlamasynda.
Mınıstr óz sózi dáleldi bolýy úshin birneshe mysal keltirdi.
«Máselen, ol reıtıngte Meksıka Qazaqstannan 12 pozıtsııaǵa joǵary. Biraq, eki myńynshy jyldan beri ol elde qatelespesem 140-qa tarta jýrnalıst óltirilip, taǵy 20-sy iz-túzsiz ketken. Oılanyp qarańyz, qaı elde synı maqalany jazýǵa úreılener edińiz - Qazaqstanda ma, álde bizden reıtıngte 12 pozıtsııaǵa joǵary elde me? Bul tizimde 42-shi orynda - Botsvana tur. Ol elde Úkimet BAQ-tyń arhıvin qurtyp, memlekettik apparattyń barlyq aqparaty qupııa túrde ustalady. Al ol aqparatqa qol jetkizý jolyndaǵy kez kelgen áreket zańmen qýdalanady. Bul mysaldardy men bireýlerge teńesý nemese bizdiń artyqshylyqtarymyzdy kórsetý úshin emes, reıtıngtiń sýbektıvtiligi men onyń esebin kórsetý úshin aıtyp otyrmyn», - dedi mınıstr.
Dáýren Abaev sonymen qatar Aqparat jáne kommýnıkatsııalar mınıstrliginiń «BAQ týraly» zańǵa engizilgen ózgerister týraly taǵy da pikir bildirdi. Baǵdarlama júrgizýshisi óz suraǵynda «kóptegen adamdar bul ózgeristerdi shekteýdi údetý dep biledi, bálkim osy ózgerister reıtıngtegi 160-shy orynǵa sebepker bolyp turǵan bolar» degen suraq qoıdy.
«Biz bul taqyrypty EYQU ókilderimen de, halyqaralyq uıymdarmen de birneshe ret talqylaǵan edik. Men birneshe ret kóptegen normalar jýrnalısterdiń jumysyn jeńildetýge baǵyttalǵanyn atap óttim. 200-ge tarta ózgeristiń ishinde tek birnesheýi ǵana pikirtalas týdyrǵan bolatyn. Jalpy, bul - qazirgi tańda jahandyq trend. Máselen, ótken jyly Germanııa Parlamenti jalǵan aqparat taratqany úshin jaýapkershilikti kúsheıtý týraly zań qabyldady. Kóptegen syndar ol kezde de aıtyldy. Biraq, zań qabyldandy. Sondaǵy jazanyń qandaı bolatynyn bilesiz be? Jalǵan aqparat taratqan jeke adam úshin aıyppul mólsherin 5 mln eýroǵa deıin kóbeıtken. Zańdy tulǵalar mundaı qylmysy úshin 50 mln eýroǵa deıin tóleıdi. 50 mln eýrolyq aıyppul kez kelgen redaktsııany bankrotqa otyrǵyza alady», - dedi Dáýren Abaev.
