Qazaqstan sovet kezeńinen qalǵan áýejaı kodtaryn ózgertýge nıetti

NUR-SULTAN. QazAqparat - Qazaqstannyń birneshe qalasynda áýejaı kodtary ózgertilýi múmkin. Bul týraly QR Indýstrııa jáne ınnovatsııalyq damý mınıstrligi Azamattyq avıatsııa komıtetiniń tóraǵasy Talǵat Lastaev aıtty, dep habarlaıdy QazAqparat tilshisi.

«Shyn máninde NNN syndy kodtyń túrli nusqalary usynyldy. Bul kod halyqaralyq IATA uıymymen kelisiledi. Kelesi qadam - Atyraý (GUW), Aqtaý (SCO) syndy ózge qalalardyń áýejaılaryndaǵy kodty ózgertý. Bul kodtar keńestik zamannan qalǵan. Osy baǵytta IATA uıymymen birlesip, jumys isteýdi josparladyq», - dedi Talǵat Lastaev elorda áýejaıynda tilshilerge bergen suhbatynda.

Onyń aıtýynsha, IATA uıymynyń negizgi talaby - áýejaılarǵa bir ret turaqty kod berý jáne ony ózgertpeý.

«Biz óz tarapymyzdan argýmentter keltirip, júıeli túrde IATA qaǵıdalaryna ózgeris engizdik. Buǵan deıingi qararda kodtyń ózgertilmeıtini aıtylsa, qazir belgili bir jaǵdaıda ózgertýge bolatyny týraly ózgeris engizildi. ıAǵnı, biz barlyq memleketterge múmkindik ashyp berdik. Olar da kórsetilgen talaptardy saqtaı otyryp, kodtaryn ózgerte alady. Biz muny Qazaqstan úshin ǵana jasaǵan joqpyz», - dedi T. Lastaev.

Sonymen birge, komıtet tóraǵasy kod ózgertýdegi shyǵyndar týraly aıtyp berdi.

«Bul ózgeris fızıkalyq turǵyda esh shyǵyndy qajet etpedi. Bul - memlekettik organdardyń eren eńbegi. Ásirese QR Syrtqy ister mınıstrligi kóp jumys atqardy», - dedi T. Lastaev.

Aıta keteıik, búgin Nursultan Nazarbaev halyqaralyq áýejaıynyń jańa NQZ kody iske qosyldy.

NQZ kodynyń avtory, qazaqstandyq dıplomat Altaı Abıbýllaev jańa kodtyń mán-maǵynasyn túsindirdi .