Qazaqstan sot júıesinde JI qoldanýdan álemdik reıtıngte 4-orynda
ASTANA. KAZINFORM — Qazaqstan sot tóreligin tsıfrlandyrý baǵytynda halyqaralyq deńgeıde joǵary kórsetkishke ıe. Seýlde ótken Azııa men Tynyq muhıty elderi Joǵarǵy sottary tóraǵalarynyń XX konferentsııasynda qazaqstandyq tarap jasandy ıntellekt negizindegi tsıfrlyq sheshimderin usynyp, sot júıesindegi tehnologııanyń rólin atap ótti.
AQSh, Kanada, Qytaı, Japonııa jáne Sıngapýrdy qosa alǵanda, álemniń 40 eliniń joǵary sot organdarynyń basshylary Seýlde Azııa men Tynyq muhıty elderiniń Joǵarǵy sottary tóraǵalarynyń XX konferentsııasynda — eń iri halyqaralyq sot forýmdarynyń birinde jınaldy.
Forýmnyń negizgi taqyryptarynyń biri jasandy ıntellektti sot tóreliginde qoldaný boldy. Qazaqstan JI paıdalana otyryp, óziniń tsıfrlyq sheshimderi men ázirlemelerin usyndy.
Aslambek Merǵalıev sot júıesin tsıfrlandyrý elimizdiń jasandy ıntellektin jáne tsıfrlyq transformatsııasyn keńinen engizý boıynsha Prezıdent qoıǵan mindetter sheńberinde júrgizilip jatqanyn atap ótti. Bul rette adamnyń aıqyndaýshy rólin saqtaı otyryp, jańa tehnologııalardy jaýapkershilikpen jáne qaýipsiz qoldaný negizgi qaǵıdat bolyp qala beredi.
— Qazaqstandy tsıfrlandyrý deńgeıi halyqaralyq baǵalaýlarmen rastalady. El BUU-nyń elektrondyq úkimetiniń jahandyq damý ındeksinde 24-shi, Eýropa Keńesiniń 47 eli arasynda sot tóreliginde aqparattyq tehnologııalardy qoldaný boıynsha Sot tóreliginiń tıimdiligi jónindegi Eýropalyq komıssııa (CEPEJ) reıtınginde 4-shi orynda, sondaı-aq Quqyq ústemdigi ındeksiniń «Azamattyq sot tóreligi» faktory boıynsha óńirde kósh bastap tur, — delingen habarlamada.
Qazaqstandyq IT-sheshimder: vırtýaldy sot úshin negiz jasaıtyn aýmaqtan tys sottylyq, «Sýdıanyń tsıfrlyq kómekshisi» jáne jasandy ıntellekt algorıtmderi qatysýshylardyń qyzyǵýshylyǵyn týdyrdy.
Konferentsııa barysynda qatysýshylar sondaı-aq sýdıalardyń táýelsizdigi jáne olardyń jumys jaǵdaılary, sot kadrlaryn irikteý standarttary men daýlardy sheshýdiń balamaly tásilderin damytý máselelerin talqylady.
Forým qorytyndysy boıynsha delegatsııa basshylary sot dıalogyn nyǵaıtý jáne ıýrısdıktsııalar arasyndaǵy ózara is-qımyldy keńeıtý nıetin rastady.
Aslambek Merǵalıev Koreıanyń joǵary sot organynyń basshysy Cho Hı-demen, Mońǵolııa joǵary sot organynyń basshysy Tsogt Tsendpen, Chehııa joǵary sot organynyń basshysy Petr Angıaloshshımen, Japonııa joǵary sot organynyń basshysy Imasaki ıÝkıhıkomen jáne Ózbekstan joǵary sot organynyń basshysy Robahon Mahmýdovamen birqatar ekijaqty kezdesýler ótkizdi.
Taraptar Qazaqstanda júrgizilip jatqan sot qaıta qurýlaryn, zańnamany jańǵyrtýdy, sot tóreligin tsıfrlandyrýdy jáne jasandy ıntellektti jaýapkershilikpen qoldaný qaǵıdattaryn saqtaýdy talqylady.
Kezdesýler barysynda Aslambek Merǵalıev sot tóreligin odan ári tsıfrlandyrý basty qaǵıdatqa negizdelýi tıis ekenin atap ótti: tehnologııa sýdıaǵa kómektesedi, biraq ony almastyrmaıdy.
— Dál osyndaı tásil Qazaqstanda qalyptasyp jatqan Bolashaq sot modeliniń negizinde jatyr, onda zamanaýı tehnologııalar adam men sot tóreligine qyzmet etedi, — dep atap ótti Joǵarǵy Sot Tóraǵasy.
Aıta keteıik, buǵan deıin Sot júıesinde kadr tapshylyǵy azaıǵanyn jazdyq.
