Qazaqstan Sot ákimshiliginiń basshysy IACA vıtse-prezıdenti qyzmetine saılandy

Qazaqstan Sot ákimshiliginiń basshysy IACA vıtse-prezıdenti qyzmetine saılandy, dep habarlaıdy Kazinform QR Joǵarǵy sotynyń baspasóz qyzmetine silteme jasap.

Baspasóz qyzmetiniń habarlaýynsha, bıylǵy jyly Halyqaralyq sot ákimshiligi qaýymdastyǵy (IACA) Býenos-Aırestegi konferentsııasyn «Sot tóreligine qoljetimdilik, ózgermeli álemdegi ákimshilik qyzmet jáne ınnovatsııalar» taqyrybyn talqylaýǵa arnady.

Onyń jumysyna Qazaqstan delegatsııasy qatysty, onyń quramynda Joǵarǵy sot tóraǵasy Aslambek Merǵalıev, Sot ákimshiliginiń basshysy Naıl Ahmetzakırov jáne Aqmola oblystyq sotynyń tóraǵasy Arman Júkenov boldy.

Forýmǵa qatysýshylarǵa jyly lebizin bildire kele, óz sózinde A.Merǵalıev Qazaqstanda júzege asyrylyp kele jatqan sot reformalarynyń nátıjesinde sotqa degen senim kórsetkishteri jaqsarǵanyn, al azamattyq sot isin júrgizýde daýlardy sheshýdiń balamaly tásilderi qoldanylyp jatqanyn aıtty.

Memleket basshysynyń 2023 jylǵy qańtarda ýákiletti memlekettik organ – Qazaqstan Respýblıkasynyń Sot ákimshiligin qurý týraly sheshimine basa nazar aýdaryldy. Bul – sot korpýsynyń táýelsizdigin nyǵaıtty jáne sýdıalardyń sot tóreligin júzege asyrýǵa shoǵyrlanýyna múmkindik berdi.

Arnaıy sessııa barysynda konferentsııaǵa qatysýshylarǵa sot júıesindegi reformalar men tsıfrlandyrýdyń qazaqstandyq tájirıbesi tanystyryldy. IACA basshysy Lýıs Palmanyń «álemdegi eń ozyq úlgilerdiń biri» dep ataǵan Sot ákimshiliginiń úlgisi Uıymnyń nazaryn ózine aýdardy.