Qazaqstan sońǵy úlgidegi «Tor» zenıt-zymyran keshenin satyp almaqshy
Qorǵanys mınıstriliginiń apparat keńesinde Qarýly kúshterge jańa áýe shabýylyna qarsy qorǵanys keshenin jetkizý josparlanǵany jóninde aıtyldy.
Atalmysh otyrysta áskerdi qaıta jaraqtandyrý is-qımyly baıandaldy. Búginde áýe shabýylyna qarsy qorǵanys quraldary basty nazarda. 2019-2020 jyldary Qazaqstan áskeriniń qarýlanýyna Reseıdiń «Býk» zenıt-zymyran keshenderi, Belarýstiń «Rosa» radıolokatsııa stansalary, sondaı-aq elimizdiń áýe shepterin qorǵaýynda turǵan otandyq «Nur» RLS jetkizildi.
Jýyrda zamanaýı «Tor-M2K» zenıt-zymyran keshenderin jetkizý josparlanyp otyr. «Tor-M2K» kez-kelgen úlgidegi ushaq pen tikushaqty, sonyń ishinde «kórinbeıtin» tehnologııamen jasalǵan tikushaqtardy ǵana emes, sonymen qatar drondardy, joǵary dáldiktegi qarýdy, sonyń ishinde radıolokatsııaǵa qarsy jáne qanatty zymyrandardy, basqarylatyn avıatsııa bombalaryn anyqtap, joıýǵa qabiletti.
Qazirgi ýaqytta ýákiletti organ (Indýstrııa jáne ınfraqurylymdyq damý mınıstrligi) jetkizýshimen sharttar jasasýda. Qorǵanys mınıstrligi atalǵan keshendi ázirlegen zaýytta otandyq áýe shabýylyna qarsy qorǵanys mamandaryn oqytýdy josparlap otyr.
Jıynda qolbasshylar barynsha jeke quram jumyldyrylǵan mamandyq boıynsha daıarlyq barysyn baıandady. Jaýyngerlik oqýdyń bul kezeńiniń qorytyndysy aldaǵy aptadaǵy baqylaý sabaqtarynyń nátıjesine qaraı shyǵarylady.
Áskerı oqý oryndaryn bitirý rásimderine baılanysty, shildede jas ofıtserler men serjanttar qyzmet atqarýǵa barady. Qolbasshylarǵa olardyń qyzmettik mindetterge beıimdelýin, laýazymdy qabyldaýyn, sondaı-aq áleýmettik máselesin sheshýdi qarastyrýyn qamtamasyz etýge nusqaý berildi.
Qarýly kúshterdegi COVID-19-ǵa ujymdyq ımmýnıtet qalyptasqanyn eskere otyryp, jaýyngerilik daıarlyq sharalary tolyq deńgeıde ótkizilýi tıis. Bas áskerı-medıtsınalyq basqarmasynyń bastyǵy jeke quramnyń 82 paıyzy ekpeniń eki komponentin alǵanyn baıandady. Sonymen qatar, áleýmettik qashyq pen betperde rejımin saqtaý ózekti kúıinde qalyp otyr.
Budan ózge de, qorǵanys mınıstri eldegi sanıtarııa-epıdemıologııa sharalary kúsheıtilýine baılanysty óńirlerdegi ákimshiliktermen aldyn alý sharalaryna Qarýly kúshterdi qatystyrý máselesin qaraýdy tapsyrdy. Atap ótsek, obektilerdi dezınfektsııalaý, áskerı-dalalyq gospıtal ashý, azamattarǵa kómek kórsetý úshin medıtsına toptaryn qurý.
«Armııa memleket atqaryp jatqan sharalardan tys qalmaýy kerek», - dep atap ótti general-leıtenant Nurlan Ermekbaev.
Mınıstr qatysqan Máskeýdegi IX halyqaralyq qaýipsizdik jónindegi konferentsııanyń qorytyndysyn eskerip, Ulttyq qorǵanys ýnıversıteti men Bas áskerı-medıtsınalyq basqarmasymen birigip áskerı medıtsınany tájirıbede qoldaný sheńberinde ǵylymı zertteýler júrgizýdi tapsyrdy. Olar otandyq jáne sheteldik tájirıbege júgine otyryp, emdeý baǵytyn ǵana emes, sondaı-aq medıtsınalyq qyzmettiń kúshteri men quraldaryn eshelondap ornalastyrý, logıstıka, jaýyngerlik ázirlikke keltirýge qajetti merzimder, medıtsınalyq personalmen jasaqtaý jáne erekshe jaǵdaıda qosymsha medıtsınalyq mekemelerdi jabdyqtaý sııaqty áskerı qyrlaryn da negizge alyp, eskerýi qajet.
Qorǵanys vedomstvosynyń basshysy Qarýly kúshter ardagerleriniń júıeli jumysyna nazar aýdardy. Áskerdiń múddesi úshin osy qyzmette mol tájirıbesi bar burynǵy áskerı qyzmetshilerdi kóptegen salalarǵa tartý qajet. Bul áskerı-patrıottyq tárbıe, qoldanystaǵy zańdy jetildirý, sondaı-aq Qarýly kúshterdiń keıbir baǵyttaryn damytý. Tárbıe jáne ıdeologııalyq jumystar departamentine «Qarýly kúshterdiń ardagerleri» respýblıkalyq qoǵamdyq birlestiginiń jumysyn jandandyrý tapsyryldy.
