Qazaqstan sońǵy 12 jylda alǵash ret aq Olımpıadanyń kúmis medaline ıe boldy
ASTANA. Aqpannyń 19-y. QazAqparat /Gúlmıra Álıakparova/ - Bıatlonshy Elena Hrýstaleva Vankýverdegi HHІ qysqy Olımpıada oıyndarynyń kúmis medalin jeńip aldy. Búgin Astanada Shtattyq ulttyq komandalar men sporttyq rezerv dırektsııasynyń keńsesinde osy qýanyshty habarǵa oraı jýrnalıstermen baspasóz máslıhaty ótti,
dep habarlaıdy QazAqparat.
Keshe, aqpannyń 18-i kúni E.Hrýstaleva 15 shaqyrym qashyqtyqtaǵy jarysta 20 nysanany óte dáldikpen atyp, Norvegııalyq sportshy Týra Bergerden 40 sekýnd aıyrmamen máre syzyǵyna ekinshi bolyp jetti.
Sport komıteti tóraǵasynyń mindetin atqarýshy Málik Sapashevtyń aıtýynsha, E.Hrýstalevanyń jeńisi kezdeısoq nátıje emes, ol ujymmen atqarylǵan úlken eńbektiń jemisi. Sebebi qazaqstandyq sportshylardy daıyndaýǵa jáne Olımpıadaǵa qatystyrylýyna úlken kúsh-jiger jumsaldy.
«Respýblıka basshylyǵy Olımpıadaǵa joldamadan kandıdattarǵa qajetti barlyq jaǵdaıdy jasady. Máselen, olar álemdegi úzdik sporttyq keshenderde jattyǵýǵa múmkindik aldy sondaı-aq, olardy álemdik deńgeıdegi úzdik bapkerler jattyqtyrdy. 51 kandıdat sportshymen jáne 47 bapkermen kelisimder jasaldy», - dep atap ótti ol.
Shtattyq ulttyq komandalar men sporttyq rezerv dırektsııasy dırektorynyń mindetin atqarýshy Temirlan Nurseıitovtyń aıtýynsha, búgingi kúni Vankýverde Qazaqstannyń ulttyq quramasy resmı emes esepteýler boıynsha 20-shy orynda keledi.
Óz kezeginde bıatlon sporty boıynsha Qazaqstan Respýblıkasy komandasynyń bastyǵy Aleksandr Tkachýk E.Hrýstalevamen telefon arqyly bolǵan áńgimesin jetkizdi. «Elena bul jeńispen búkil Qazaqstandy quttyqtady. Ol Qazaqstanda bıatlon sportynyń bar ekenin jáne ol qarqynmen damyp kele jatqandyǵyn kórsetti. Bul nátıje eń aldymen, sportshy qyzdyń óziniń úlken eńbeginiń jemisi. Hrýstalevanyń arqasynda Qazaqstan 39 memlekettiń ishinde qyzdar komandalary arasynda jalpy 11-shi orynǵa ornalasty», - dedi ol.
A.Tkachýk bıatlonshy qyzdyń bul jeńisi basqa sportshylarymyzdy da jeńiske jigerlendire túsedi degen senimin bildirdi.
Esterińizge sala keteıik, Olımpıada oıyndarynyń altyn alqasyn ıelengen sportshyǵa taǵaıyndalǵan memlekettik birjolǵy syıyqynyń kólemi - 250 myń AQSh dollary, kúmis alqa - 150 jáne qola medal - 75 myń dollar. Altynshy orynǵa deıingi nátıjelerge qol jetkizgen sportshy da qur alaqan qalmaıdy.
Aıta keteıik, E.Hrýstalevanyń bul kúmis alqasy 1998 jyly Japonııanyń Nagano qalasynda ótken Olımpıadadan keıingi Qazaqstannyń alǵashqy júldesi. Búgingi kúni Vankýverdegi HHІ qysqy Olımpıadaǵa attanǵan qazaqstandyq sportshylardyń derlik barlyǵy (frıstaıl-akrobatıkadan basqa) ónerlerin kórsetti. Búgingi kúnge deıingi jetistikterge qysqasha toqtalatyn bolsaq, shańǵyshy Alekseı Poltoranın - 5 oryn; Denıs Ten - álemniń eń úzdik 10 konkıshisi qataryna endi; konkıshi Dmıtrıı Babenko - 15 oryn; Elena Hrýstaleva - 5 oryn, bıatlon jáne basqa da qashyqtyq; shańǵyshy Nıkolaı Karpenko - 30 oryn. Short-trek boıynsha da qazaqstandyq sportshylardyń kórsetip jatqan nátıjeleri jaman emes.
Aldymyzda taǵy birneshe qashyqtyqta jarystar bar, E.Hrýstaleva aldaǵy mass-start pen estafetada da jaqsy óner kórsetedi degen senim mol.
Anyqtama úshin: 1980 jyly Krasnoıarskide týǵan Elena Hrýstaleva 2006 jyldan beri Qazaqstan Respýblıkasynyń azamaty bolyp tabylady. Eń úlken jetistigi - 2009 jylǵy Álem chempıonatynda 6-shy oryn.
