Qazaqstan sońǵy 10 jylda 215 mlrd. dollar ınvestıtsııa tartty - QR IDM
Bul týraly Ortalyq kommýnıkatsııalar qyzmetinde ótken brıfıngte QR Investıtsııalar jáne damý mınıstrligi Investıtsııalar komıtetiniń tóraǵasy Erlan Haırov málim etti.
«Biz 2005-2015 jyldar aralyǵynda 215 mlrd. dollar ınvestıtsııa tarttyq. Negizinen, olar óndirý salasyna tıesili ekeni málim. Biraq sońǵy jyldary biz sheteldik ınvestorlardyń óńdeýshi salaǵa kóp mán berip kele jatqandyǵyn kórip otyrmyz. Óńdeýshi salaǵa tartylǵan barlyq ınvestıtsııalardyń 74 paıyzy Memleket basshysynyń tapsyrmasymen qolǵa alynǵan Indýstrıaldyq-ınnovatsııalyq damý baǵdarlamasy jyldaryna tıesili bolyp otyr», - dep atap ótti E.Haırov.
Onyń sózine qaraǵanda, Qazaqstan óńdeýshi salaǵa baǵyttalatyn ınvestıtsııalarǵa úlken mán berip otyr.
«2015 jyly kapıtaldyń deni damýshy elderden damyǵan elderge qaraı aǵyla bastady. Ol úderis Qazaqstandy da aınalyp ótken joq. Biz taý-ken salasynda ınvestıtsııalardyń 64 paıyzǵa, shıki munaı óndirý - 73 paıyzǵa, qurylys pen saýda - 50 paıyzǵa tómendegenin kórip otyrmyz. Onyń qasynda óńdeýshi salanyń hali áldeqaıda turaqty. Jartyjyldyqta oǵan tartylǵan ınvestıtsııalardyń kólemi tek 10 paıyzǵa kemigen», - dedi komıtet basshysy.
